Vawiin ni 16 July, 2013 hian Aijal Club ah UNODC leh WORLD VISION India tangkawpin Mizorama drug hmansual leh HIV/AIDS pung zel leh harsatna hrang hrang chungchang zir ho a buatsaih a. He hun ah hian Pi Esther Lalruatkimi, Secretary, Health Services Department chu khuallian niin he hun hi a hawng .

He Seminar hi Session 4 a then a ni a. Session hmasa ber hi Dr. Lalrinliana Sailo, Director, Hospital & Medical Education in kaihruaiin, he seminar hman a nih chhan te a sawi a. Khuallian Pi Esther Lalruatkimi chuan thusawiin he seminar buatsaih anih chu lawmawm a tih thu sawiin, drug hmansual chungchang hi uluk zawk a kan ngaihven a tul leh tawh zia a sawi a. Thil thar hrang hrang hmachhawn tura kan inpeih a ngaih zia leh, hemi kawngah hian NGO te leh sawrkar hnuaia department te an thawhho a tul zia a sawi bawk a ni.

Session 2 leh 3 naah hian thupui hrang hrang hmanga mithiamte thusawi leh sawihona leh zirhona neih a ni.

UNODC Regional Office for South Asia a Project Co-ordinator Pu Kunal Kishore chuan he hun an buatsaih hma hian Mizoram hmun thenkhatah damdawi khawihtu te ngei hmang tangkaiin survey an neih hmasak thu sawiin, an survey naa a landan in Mizoram chu Thailand, Indonesia leh Cambodia te ang a damdawi hluarna ram anih a hlauhawm thu sawiin , tan lak a ngai hle a ni a ti. He hun an buatsaih chhan tak chu drug che vel khuahkhirh theitu sawrkar department hrang hrang te leh a enkawlna lam tumtu department te leh NGO te an thawh ho theih nan leh Mizoramin Drug Policy mumal tak a duanchhuah theih nana tih anih thu a sawi. Tunah hian Durtlang Hospitalah ATS Treatment Centre hawn tum anih thu a sawi bawk.

Nikum November thla atanga kumin July thleng khan Aizawl Civil Hospital-ah damdawi hmansual avangin mi 202 dah luh an ni a, chung zingah chuan mi 19 in nunna an chan a ni.