Mizoram State Election Commission-in Aizawl District-a khaw 13 leh Kolasib District-a khaw 2 Village Council inthlan ni atana ni 23 July 2013 a lo tuk tawh leh Nomination File hun ni 15 July, 2013-a tawp ta chungchangah Hmar Welfare Committee te hmalaknaa party tin candidate siam lova common candidate siam tura mipui an ngenna avangin Aizawl District-a khaw 13 zinga khaw 5 chuan Hmar Welfare ngenna hi an zawm ni-a hriat a ni a, Khawpuar, North Tinghmun, Mauchar leh Zokhawthiang ah chuan seat awm zat chiah nomination file a ni a, Palsang ah independent candidate chauhvin nomination an file bawk a. State Election Commission chuan, Constitutional body a nih angin, invauna leh inkhuahkhirhna tel lova mipui ten zalen taka roreltu tur inthlanna an neih theih nan inthlanna thianghlim tak neih hi a thupui reng a. Political party hrang hrang leh candidate ten hetiang boruak hnuaiah hian nomination pawh an file loh phah niin hriat a ni a, State Election Commission tan chuan pawm theih a ni lo a ni. Hmun hrang hrang atanga thudawn ngaihtuahin, Hmar Welfare Committee-in political party leh candidate te hnena an ngenna hian inthlanna felfai leh thianghlim a tithuanawp niin State Election Commission chuan a ngai a ni.

Heng hre reng chung hian State Election Commission chuan Rule 3(1) of the Mizoram (Constitution of State Election Commission) Rules, 2008 leh Rule 5 of the Mizoram (Election to Village Councils) Rules, 1974 as amended Dan-in thuneihna a pek angin heng - Khawpuar, North Tinghmun, Mauchar, Zokhawthiang leh Palsang Village Council te tan Revised Schedule for Filing of Nominations hetiang hian a siam thar leh ta a ni :-

1. Nomination File ni tawp - 17.7.2013 (Nilaini) (2:00 PM thleng)

2. Scrutiny of Nominations - 17.7.2013 (Nilaini) (2:00 PM - 3:00 PM)

3. Nomination hnuhdawh ni tawp - 17.7.2013 (Nilaini) (3:00 PM - 4:00 PM)

4. Candidate te symbol pek leh Candidate List tarchhuah - 18.7.2013 (Ningani) (10:00 AM atangin)

5. State Election Commission & District Election Officer te hnena Contesting Candidate List thehluh - 19.7.2013 (Zirtawpni)

State Election Commission chuan inthlan ni etc. te chu a ngai a ni ang a, hun tuk hmasa lama Nomination lo file tawh te tan Nomination hi tih that leh a ngaih loh thu a chhuah nghal bawk a ni.