Labour and Employment Minister Pu Lalrinliana Sailo hmalakna in Employment Provident Fund Scheme(EPFS) chungchanga harsatna neite tan tunkar chhungin Mizoram Building and Other Construction Workers Welfare Board Office, Upper Republic- ah EPFO hotute dawr theihna tur ruahmanna siam a ni.
Hemi chungchangah hian vawiin khan Labour and Employment Minister Pu Lalrinliana Sailo, Mizoram Building and Other Construction Welfare Board hotute leh Employment Provident Fund Organisation(EPFO) Enforcement Officer Bipin Saikia, Sub-Regional Office, North East Region, Shillong ami te chu an inkawm a, Bipin Saikia hian Employment Provident Fund Scheme(EPFS) chungchanga harsatna neite tan tunkar chhungin nitin dar 10:30 leh dar 11:30 inkara dawr theih tura a thutchilh tur thu a sawi a ni.
Hemi chungchangah hian Pu Lalrinliana Sailo chuan Mizoramah Sub-Regional Office dah ve ngei tura hmalak a nih tih a sawi a, EPFS chu sawrkara hna thawk nghet lo te tan Security dik tak, damchhunga chhungkua sum leh pai dinhmun him neia, Pension neih ve theihna a ni tih sawiin, he ruahmanna hmang hian tun dinhmuna Public Sector Undertaking , Corporation, Autonomous Institution, Bank thenkhat, Private Institution leh mimala harsatna hei mek, an lehkha chingfel tura Shillong a zin ngai thin te tan an harsatna a a tih ziaawm ngei a beisei tih a sawi a ni.
Mizorama Sub-Regional Office a awm loh avang hian EPF atanga sum lakchhuak turte,thil diklo awm tidik tur te leh inbiakpawhna kawngah harsatna a awm thin avangin a dah tu ten harsatna an tawk mek a, chingfel tura Shillong pan zel a tul thin avangin EPFS zawm ten sum leh pai bakah hun tamtak an sengral thin a ni.
EPFS zawm te hian an thlatin hlawh atanga 12% thawhin, a ruaitu in 12% vek a tum sak bawk a, hemi tlingkhawm atang hian EPFO chuan 8.33% chu Pension fund a dah in, 3.67% chu Employees Provident fund(EPF) a dah a ni. EPF hi damlohna, Inneih leh lehkha zirna atana lakchhuah theih niin, a bak zawng chu kum 10 dah anih hnuah Pension fund atang hian dam chhungin thlatin Pension a dahtu in a nei thei a ni. EPFO hian a an scheme zawm tute sum hi 8.50% in a tihpun sak mek a ni.
