North Eastern Council (NEC) in vawiina Plenary meeting vawi 62-na New Delhi a neihah Chief Minister Pu Lal Thanhawla chuan Mizoram mamawhte sawi chhuakin rawtna engemawzah a thlen.
Chief Minister chuan NEC leh Non Lapsable Central Pool of Resourses (NLCPR) Funds te chu State Annual Planah khung tel turin a thlen a. Motor kawngpui siam chungchangah NEC hnuaia Road Project te hi Inter State kawngpuite chauh a huam avangin Mizoram leh state dang thenkhat tan harsatna a awm thin thu a sawi a. Mizoram kawngpuite hi Chhim leh Hmar zawnga kal an nih avangin chhak leh thlang inkalpawhna lam hi inter state connectivity policy hian a huam theilo a ni a ti a. Chuvangin international border 800 Kms chuang awmna Mizoram kawngpui siamna tur hian Inter District inkalpawhna ngaipawimawha, chutianga NEC Fund pawh herrem nise a ti a ni. Heng bakah hian Chief Mnister chuan Ministry of Road Transport & Highways tihdan zulzuiin NEC Fund atanga siam kawngpuite hi a enkawl zuina pawh NEC atang tho hian dah nise a ti a. Hemi chungchanga thurawn sorkarin a hmuh angin 14th Finance Commissionah pawh kan thlen ngei ang a ti.
Mizoram sorkarin NEC a ruahmanna leh rawtna a thlen thintea estimates siamah te contingencies atante, quality control atante leh tul dang atan engemawzah dah thin nise Pu Lal Thanhawla chuan a ti bawk a. State in senso belh ngai awm theite tum thin tura atih hi kan tlin loa, chuvangin hetiang ang kalphung hi chu bansan nise tiin rawtna a thlen bawk a. Line ministry hrang hranga rawtna an thleluh leh chhanna an hmuh hun chhung hi rei tak anih thin avang bawkin, thla thum chhung tal chinfelna hun hi bituk nise tihte a thlen a ni.
Chief Minister Pu Lal Thanhawla chuan Central sorkarin Ministry of DONER tan leh NEC tan Secretary hran ve ve neih a remti chu a lawmawm tak zet a ni a ti a. Hetih laia NEC Secretary hnena financial power Rs.15 Crore thleng thuneihna a pe chu lawmawm a tihthu a sawi bawk a. Hetih rual hian Central Ministry-a Additional Secretary ten power an neih ang, Rs.50 Crore thleng thuneihna pek ni ve se tiin rawtna a thlen bawk a ni.
