Vawiin khan Lawngtlai Agriculture Circle chuan Upper Saikah-ah kut hna thawktute tan ‘cropping system based training’ an buatsaih a. Bialtu MDC, Executive Member Pu H.Chhuanawma’n a hmanpui.

Pu H. Chhuanawma chuan mipui ai awha thlan an nih ang ngeiin, mipui tan an ding zel dawn tih sawiin, sawrkarin mipuite hamthatna tur programme hrang hrang a duan chu sawrkar official-te chuan dik takin an kalpui tur a ni, a ti a. Mipuite pawhin tan tlak leh chhan tlaka hna an thawh a tul thu sawiin, sawrkar atanga tanpuina an dawnte chu din chhuahpui tum ngei turin a fuih bawk.

SDAO Pu S. Chinzah chuan agriculture department-in mipuite tana hna thawh tur hma chhawp an neih hrang hrangte a sawi a. Kut hna thawktute chu puih an ngaihna apiang leh a tul hun apianga pui thei turin an inhawng reng tih a sawi.

He hun hi Lawngtlai Agriculture Circle-a AEO Pu Malsawmdawngkima’n a kaihruai a. Rev. F.Lalringliana, LIKBK, Saikah-in hunserh hmangin, Gram Sevak Pu Lalchhuanawma Ralte chuan an hma lakna a sawi fiah a. AAI Pu Lianchhinga’n lawm thu a sawi bawk.

Training-ah hian KVK Lawngtlaia Scientist (Plant Protection) Pi Esther Zonunpuii chuan thei leh thlai enkawl dan (horticulture lam) zirtirin, ATMA Lawngtlaia Deputy Project Director Dr PL Lalruatfela chuan ar vulh (poultry) lam a zirtir a. Zawhna leh chhanna leh sawi hona hun hman nghal a ni.

He hunah hian Rainfed Area Development Programme (RADP) hnuaia ar vulh tur beneficiary mi 10 hnenah ar note 30 theuh pek an ni a. A ti tha zualte chu la pek belh leh tur an ni. Hei bakah hian ar in sak sa, a te chaw leh a lian chaw ip 1 ve ve, tui pekna leh damdawi pek theuh an ni bawk.

RADP hnuaiah hian integrated farming system kalpui mek a ni a. Hemi atan hian horticulture-ah beneficiary mi 14, animal husbandry-ah mi 10 leh fishery-ah mi 10 thlang chhuakin, tanpuina pek an ni ang a. Trade tina a ti tha zualte hi lawmman pek an ni bawk ang.