142/2023-2024

Aizawl, 18th April, 2023: Consul General Pi Melinda Pavek, U.S. Consulate General, Kolkata-a an hotulu  ber  chuan Health Minister Dr. R. Lalthangliana chu vawiin khan MINECO Confernce Hall-ah a kawm.

Higher & Technical Minister Dr. R. Lalthangliana chuan Consul General Pi Melinda Pavek ten Mizoram an lo tlawh chu a lawmawm hle a ni, a ti a. Mizoram chu Bangladesh leh Myanmar te nen ramri thui tak intawmin, hei hian ramdangte nena insumdawntawnnaah kawngro thui tak a su a ni, a ti bawk. Ram pahnih inkarah thawhhona tha awm zel se a tih thu Minister chuan sawiin, Mizo zirlaite leh zirtirtu ten America-a ‘exchange program’ an neih theih nana hmalakpui tur leh zirlai harsa zawk te tana tanpuina pe turin Consul General hi a ngen nghal a ni.

Mizoram chu India rama nau piang boral tlemna ber, ziak leh chhiar thiam tam ber dawttu state leh NITI Aayog tihchhuah Health Index –a state tenau zinga titha ber (best performing state) a nih thu Minister chuan a sawi a. Covid hripui dona kawnga Kohhran, khawtlang leh tlawmngai pawlte hmalakna leh tawiawmna chu thil chhinchhiahthlak tak a ni, a ti bawk. JICA hnuaia sak tur Cancer Superspeciality Hospital, Mizoram State Health System Strengthening Project, district tina oxygen plant bun te leh ICU khum tam zawk neih belh te chu hriselna kawnga mellung pawimawh an ni, Minister chuan a ti a. Hetih rual hian HIV/AIDS, Cancer, Malaria leh TB vanga harsatna a tawh mek te titawp turin thawhhona tha neih a tul thu a sawi bawk.

Consul General Pi Melinda Pavek pawhin Mizoram sawrkar hmachhawp hrang hrang te hmu theia a awm chu lawmawm a tih thu a sawi a. Mizoram sawrkar nen thawhhona tur kawng tam tak a awm a ni, tiin Mizoram harsatna hrang hrang – HIV/AIDS, Canncer leh a dang te thlirho a, tihtawp an nih theihnan theihtawp chhuah a tul thu a sawi bawk a ni.

Mizo zirlai leh zirtirtute chu America-a zirna sang zawk zir tura a duhsak thu Consul General chuan a sawi a, US-India Education Foundation  (USIEF) , EducationUSA, Fullbright Scholarship leh American online library-te hmang tangkai turin thu a chah a. B-20 meeting neih zawh takah Mizoram mau chanchin a lo hriat thu sawiin, ‘bio-fuel’ leh ‘carbon sink’ a hman theih anih a beisei thu leh hemi atan hian zirchianna zau zawk neih a duh thu a sawi bawk a ni. 

Vawiin thutkhawmah hian Commerce & Industries, Health & Family Welfare and Higher & Technical Education Department atangin sawrkar official te an tel a. Powerpoint presentation hmangin department hmalakna leh hmachhawp hrang hrang sawizauna hun an hmang a ni.


Attachment

  • Loading attachment...