Vawiin khan Lunglei BDO Conference Hall-ah Project Implementing Agency IWMP-I, Lunglei leh BDO, Rural Development Block, Lunglei tangkawp buatsaihin Village Council thar te tan Orientation Programme neih chhunzawm a ni a, Lunglei khawpawn khaw 36 atangin VC member 72 an tel. Kar hmasa ni 5.6.2015 (Zirtawpni)-a Lunglei Town Area chhunga VC tharte tana buatsaih tawh ang bawkin vawiinah pawh hian ‘Convergence of IWMP with MGNREGA’ chungchang hrilhfiah an ni.

Orientation Programme kaihruaitu Lunglei BDO Dr.Malsawmtluanga Fanchun chuan sorkar scheme leh programme hlawhtlinna tur chuan grassroots level-ah Village Council te an pawimawh ber a, ruahmanna fel tak an siam thiam a ngai a ni, a ti a. MGNREGA hnuaiah hian land development leh agriculture lam thil kalpui nasa tawh a, hemi chauh ni lovin khawtlang mamawh tur thildang pawh dap thiam a ngai a ni, a ti bawk. VC tha leh tha lo chu an hnathawhah a lan dan avangin ruahmanna an siam leh sum vawn danah uluk turin a chah.

Training hi Pu Lalhmingmawia leh Pu F.Lalthanzama, Faculty (Agri) ETC, Pukpui ten an pe a ni.