COVID-19 hri danna (vaccine) pek dan tur ngaihtuahtu "State Task Force for COVID-19 Vaccination" thutkhawm vawihnihna chu an Chairman Pu H. Lalengmawia, Commissioner & Secretary, Health & Family Welfare Department hovin vawiin chawhnu khan SAD Conference Hall, MINECO-ah neih a ni.

January ni 16, 2021-a India Prime Minister Narendra Modi-a'n a tlangzarh veleh a COVID-19 hri danna (vaccine) Mizorama kalpui dan tur sawrkar laipuiin a ruahman chu tha taka kalpui turin engkim inpuahchah fel tawh a nih thu vawiin meetin- ah hian tarlan a ni a. Vaccine tlangzarh ni hian India ram puma vaccine pekchhuahna hmun (vaccination site) 5000 ah hri danna hi pekchhuah tur a ni. Mizoramah chuan hemi ni a hri pekchhuahna tur hmun pali - Aizawl Civil Hospital, Lunglei Civil Hospital, Kulikawn Sub-District Hospital leh Upper PHC, ITI-ah te kalpui nghal a ni ang. Sawrkar laipui ruahman danah chuan vaccination site atan hian healthcare facilities hman tur a ni a, school leh hmun dang hman phal a ni lo. State tinah hian Vaccination Special Site neih tur a ni a, State lianah pahnih neih turin State tenau ah pakhat neih tur a ni. Heng Special Vaccination Site ah hian Video Conferencing system dah tur a ni a, Sawrkar Laipui nen inthlunzawmin a tul hun apianga inbepawp reng theih turin an inpeih tur a ni.

Sawrkar Laipui ruahman angin Mizoramah chuan Health Care Workers hovin an dawng hmasa dawna, a dawng turin mi 14,421 (State Health Care Workers 14,107 leh Central Health Care Workers 314) chhinchhiah tawh an ni a. An zingah hian Daktawr leh Nurse bakah Damdawiin-a thawktu hrang hrang te leh Ambulance driver te an tel a. Sawrkar laipuiin Operational Guidelines a duan sa khauh taka kenkawh tur niin, vaccination site ah te hian room pathum - waiting room, vaccination room leh observation room a awm tur a ni a. Thutna felfai, tui thianghlim in tur a awm tel tur a ni. Vaccine tlangzarh ni hian vaccination site tinah mi 100 hri danna hi pek tur an ni a. January, 2021 chhungin ni 9 chhungin nitin mi 880 Mizoramah hri danna hi pek tur a ni.

Mizorama vaccine pek chhuah tur hi Serum Institute of India siam Covishield hman tur a ni a. A thawhkhatna atan vaccine 18,500 dawn niin heng zinga 10% (1850) hi thla venga dahthat tur a ni. Vaccine hi dose hnih a pek tur niin vaccine dose khatna dawn atanga ni 28 hnu ah dose hnihna hi pek leh tur an ni a. Vaccine rawn thleng hmasa hi dose hnih tur a nih avangin a thawhkhatnaah hian Health Care Workers 8,325 in an dawng thei dawn a, Sawrkar laipuiin database kaltlanga an bithliah hovin a tahtawlin an dawng dawn a ni.

Meeting-ah hian Covishield chu uluk taka enchhinna kalpui a nih avangin a him tawk tih tarlan a ni a, vaccine pek a nih hian mi thenkhatah chuan khawsik te an awm fo thin tih tarlan niin, hetiang an awm a nih pawhin hlauhthawnawm a nih loh thu sawi a ni.

Meeting kaihruaitu Pu H. Lalengmawia chuan India ram state thenkhat zingah Health Care Workers vaccine beneficiary la tifel hleithei lo an la awm laia kum kalta lama Mizoramin a peihfel thei chu Health Department-a thawktu te remhriatna leh thawhrim rah a ni tih sawiin, a tifel hmasa zinga an tel thei chu chhuanawm tak a ni, a ti a. Vaccine pe chhuak tura Mizoram inpuahchahna te chu lungawithlak a tih thu a sawi bawk.