Vawiin khan DRDA, Champhai bultumin Champhai North bialtu MLA Pu TT Zothansanga, Parliamentary Secretary in VAGY Model Village tura a thlan, Rabung khuaah Free Mobile Health Clinic buatsaih a ni a. Free Clinic rual hian bialtu MLA hovin District Official-te leh Rabung khawtlang hruaituten VAGY hnuaia hmalakna chungchangah meeting an nei nghal bawk. Rabung khuaa VAGY Meeting leh Free Clinic hi Bialtu MLA Pu TT Zothansanga leh District Bawrhsap Pu Vanlalngaihsaka, IAS bakah District Official dangten an hmanpui a ni.
Free Mobile Health Clinic hawnna inkhawm tawi Rabung Community Hall-ah neih niin Champhai District Bawrhsap Pu Vanlalngaihsaka, IAS in a kaihruaia.
Khuallian, Parliamentary Secretary Pu TT Zothansanga chuan Free Mobile Health Clinic hawn paha thu sawiin VAGY Model village atana a thlan, Rabung khaw tana District thuneitute hmalaknaah lawmthu a sawi a. Rabung leh a chhehvel inkalpawhna tura a hmalakna tarlangin Rabung khua leh Tualcheng inkar kawng laih na tur DPR siam mek a nih thu leh Rabung leh Hliappui inkalpawhna tur pawh ruahman mek a nih thu a sawi a. Bialtu MLA hian Rabung khaw mipui, a mamawh apiangten an hman theih turin electrict hmang Oxygen a pe bawk.
Champhai District DRDA Project Director, Pu CC. Lalchuangkima, MCS chuan VAGY Model Village, Rabung khaw chawikan nana hmalakna hrang hrangte report a pe a, Rabung khaw VCP in lawmthu sawiin hun a khar a ni Free Clinic hawnna inkhawm tawi zawh hian Rabung Primary School-ah Free Mobile Health clinic neih chhunzawm nghal niin Rabung leh a chhehvel khaw mipuiten an hlut hle a, Champhai District Civil Hospital thawktuten damlo en hna thawkin mi 330 lai an en hman bakah damdawi a thlawn sem nghal a ni bawk.
VAGY Model Village hmasawnna tura hmalakna hrang hrangte ngaihtuahin bialtu MLA hova meeting neih a ni bawk a.
Meeting hi DC-in kaihruaiin khawtlang hruaituten an hmalakna hrang hrangte leh an harsatnate an tarlang a ni. Rabung khua hian naupang school kal tir kawngah te, naupang vaccine laktir kawngah te, thianghlimna kawngah te, puitling ziak leh chhiar thiamlo te zirtir kawngah te hma an la tha hle tih reportah tarlan a ni bawk. Meeting zawhah Rabung khaw bawlhhlawh paihna tura dumping ground siam chu bialtu MLA hova en a ni bawk.
