Vawiin khan Mizoram hmun dangte rualin Mizoram State Anti-Tobacco Day chu Mamit Chhim veng Hall-ah hman a ni.

Mizoram State Anti-Tobacco Day hmanna hi Dr. Hmingthanmawii CMO kaihhruaiah hian Pu C. Lalsangluaia, SDO (Sadar) Mamit chu khuallian a ni a. Khuallian chuan zuk leh hmuam a kan fihlim theih nan he ni hi hman tangkai a nih ngei a beisei thu leh a la ti ve lo te chu fihlim chhunzawm zel turin a chah a ni. He ni hmanna ah hian Mizoram State Anti Tobacco Day hman a nih chhan te Anti-Tobacco Squad leh Task Force Mamit hmalak dan te Pi Sarah Laldintluangi, Asst. Director, Food & Drugs Mamit hi kalkhawmte a hrilh bakah Mizoram sorkarin September 11 hi Mizoram State Anti-Tobbacco Day a a puan thu a sawi bawk. Dr. P.C. Lalawmpuia Medical Officer leh Pi Eloy Zonunpari Distric Programme Manager, NRHM ten vaihlo that lohzia zirtirna an pe bawk.

Mamit ah hian Anti Tobacco Squad hi 2010 khan bultan niin Squad drive vawi za chuang neih a ni tawh a. Tunah hian Squad ah member 31 an awm mek a, June 12, 2014 a Anti Tobacco Squad siamthat a nih atanga vawiin thlenin Squad drive 3 neih a ni tawh a, dan bawhchhia mi 10 man niin pawisa chawitir an ni. Anti Tobacco Squad bakah hian Anti Tobacco Cell leh Task Force din a ni bawk.

Kum 2009, 2011 leh 2013 a District hrang hrang zir chianna neih ah Mamit District chu vaihlo do kawnga hma la tha ber a puang niin puipunna hmun a meizu hmuh tur awm lo, meizial khu rim hriattur awm lohna hmun, meiziail bung leh lighter, ashtray etc. hmuh tur awm lohna hmun a puan a ni. Hei vang hian Mamit district chu “Overall Best Performing District” ah puan niin Mamit DC Pu K. Lalthawmmawia chuan Mamit District aiawhin lawmman hi Aizawl ah a dawng a ni.