Thawhtan, September ni 15 chawhnu dar 1:00 PM khian ni 6 chhung awh tur Mumbai International Film Festival in Mizoram chu tan a ni dawn a, Film Festival hi Chief Minister Pu Lal Thanhawla’n a hawng dawn a ni. Film Festival rual hian ni 6 awh tur Film Making Workshop pawh buatsaih nghal a ni dawn.
Malsawmkima Chhangte siam Chengrang Lanu tih film chu Festival-a Inaugural Film a ni dawn a, he film hi kumin kum tira Mumbai a MIFF 2014 neih takah khan film chhuah tura thlan zingah a tel a ni.
MIFF in Mizoram hi Sawrkar Laipuia Ministry of Information & Broadcasting hnuaia Mumbai-a hmunpui nei Films Division leh Mizoram Sawrkara Information & Public Relations Department tangkawpte buatsaih a ni.
Workshop ah hian Mumbai International Film Festival (MIFF) atanga mi thiam ten nitin film siamtu thlan bikte hnenah zing (dar 9:00 atanga dar 2:00 thleng) training an pe ang a, chawhnu (dar 2:00 leh dar 4:00 inkar) lamah MIFF in a thlan chhuah film hmuhnawm tak tak thlirhona neih thin a ni ang.
Mumbai International Fim Festival (MIFF) hi Films Division, Ministry of Information and Broadcasting buatsaih a ni a, kumkhat dana neih thin a ni. He Film Festival hi National Centre for Performing Arts (NCPA), Nariman Point, Mumbai-ah neih thin a ni.
