Mizorama meizial zuk dotu pawl Indian Society on Tobacco & Health Mizoram Chapter (IST&H, MI) kum 25 tlin, silver jubilee lawmna ni denchhena vawiin Mizoram State Anti Tobacco Day a sorkar-in a puan lawmna Vanapa Hall-a buatsaihah Chief Minister Pu Lal Thanhawla chu khuallian a ni.

Chief Minister chuan India rama mithiamte chhut danin natna kan neihte 40% hi vaihlo leh kaihhnawih hman vang a ni tih an hmuhchhuah thu a sawi a. Vaihlo zuk leh hmuam ching India ramah mi nuai 2750 vel kan awm thu leh kum 2011-12 chhung khan zuk leh hmuam avanga natna inenkawl nan cheng vaibelchhe nuai khat leh sangli sen a ni, a ti a. Vaihlo dona dan COPTA duangtu ‘expert panel’ chuan vantlang hmuna meizial zu man Rs 200/- chawi tir thin chu Rs.20,000/-ah tihsan an rawt thute,sikret a tlawna zawrh khap te leh adang tam tak tih danglam tura rawtna an siamte chu Parliament winter sessiona putluh tum anih thu Pu Hawla hian a sawi a. Keini sum leh paiah leh ei leh bara intodelhlo hian tulloa zuk leh hmuama sum tam tak kan seng thin hi kan inbihchian a hun tawh hle a ni a ti.

Vaihlo do kawnga IST&H MI ina a hmalakna hian sorkar pawh a sawiharh a ni tiin, Chief Minister chuan kum 1990 chho atanga zuk leh hmuam dona kawngah sorkar angin hmalak tan ani a ti a. IST&H MI Silver jubilee ni  State Anti Tobacco Day a hman a ni chu a inhmeh hle a ni a ti a. A bul kan tan chauh a ni a, nasa leh zuala kan do chhoh zel a tul dawn a ni a ti. Mizoram hi khawvela a ber kan nihna, cancer tamna ber kan ni hi a chhuanawm loh hle a ni a ti a. Zuk leh hmuam ti thin zawng zawngte chu nghei mai duh tawk lova tumruhna nen, sima fihlim tum turin a chah bawk a ni.

Chief Minister hian Vaihlo dona kawnga district titha bikte hnenah lawmman DC theuh te hnenah a hlan a, Category I : Best Performing District ah pakhatna  Mamit; pahnihna Serchhip leh pathumna Kolasib te hnenah Citation a hlan a. Category II : Most Improved Districts ah pakhatna Lunglei; pahnihna Lawngtlai leh pathumna Aizawl district te hnenah citation a hlan theuh bawk. Anti Tobacco Day hriatrengna Souvenir a tlangzarh bawk.

Khualzahawm Health Minister Pu Lal Thanzara chuan mihring tana hman tura siam, vaihlo hi a hmangtu tihlum thei awmchhun a ni, a ti a. A ni pawh mei zu thin anih thu sawiin, Pathian chaknain a sim thei a ni, a ti a. UPC NEI kohhran ten mei zuka fihlimlo te chu pulpit-a din an phal lo hi an entawntlak a, an fakawm hle a ni a ti a. ISTH MI leh NGO te, Mizoram State Tobacco Control Society hmalakna rah kan hmu chho mek a ni tiin, vantlang hmuna meizial zu thin pawh kum 2013 chuan 7% chauh an awm tawh thu a tarlang bawk a ni.

ISTH MI Secretary Pu Thanseia’n report tawi a pekah an pawl chu ni 11 September 1989 din anih thu leh a tirah chuan nuihzattu leh runluihtu engemawzah an awm thu te, vantlang leh officeah te ‘Mei Zuk Phal Loh’ tih te an tar thin thu te, Mizoram khaw tinah meizial zu mi awmzat hriat tuma MHIP kaltlanga survey an neih thu te, tuibur that lohna research an buaipui dan te leh vaihlo do chungchanga China rama international conference a an tel thu te a sawi bawk.

Inkhawm kaihruaitu Pi L.Tochhawng, Chief Secretary chuan anti tobacco day hmasa ber ni hi chak leh zuala vaihlo do kawnga bul kan tanna ni thei se a duhthu a sawi a. World Health Organisation (WHO) in vaihlo dona ni ah kumtin may thla ni 31a hman thin thu sawiin Mizoramah chuan kum 1989 atangin kan hmang ve tan a ni a ti a.Mizoram chu Smoke Free State ah ni 29.6.2011 ah puan anih thute, ni 22 Aug 2012 atanga Mizoramah Gutkha product reng reng zawrh phal anih loh thu te a sawi bawk a ni.

ISTH MI President Pi Lal Riliani pawhin thusawiin, inkhawma kalkhawm zawng zawng ten vaihlo laka fihlim leh dona kawnga hmala tura intiamna neih tirin thutiam lakna a kaihruai bawk a ni.

Report dawn danin vawiin Anti Tobacco Day denchhen hian Aizawl New Market-a vaihlo leh tuibur zuar zawng zawng ten an dawr an khar vek a ni.