Vawiin chawhnu dar 2 : 00 Pm khan a vawi khatna atan “Mizoram State Anti Tobacco Day-2014” chu DC’s Conference Hall, Saiha-ah hlawhtling taka hman a ni.

He Ni hmanna inkhawm hi Pu John L.T. Sanga,Working Chairman, Saiha District Anti Tobacco Squad (S.D.A.T.S.) & Addl. Deputy Commissioner ni bawk chuan a kaihruai a. Pu R.T. Zachônô, Chief Executive Member, Mara Autonomous District Council (M.A.D.C.) chu Khuallian a ni. Thu sawiin Khuallian chuan Mizo te Rilru, Thlarau leh Taksa thlenga chaklohna min thlen tu Vaihlo leh a kaihhnawih hrang hrang dona Ni a Khuallian a atang thei chu lawmawm a ti a, kan pi leh pu te  khan Vaihlo that loh zia lo hria in a thatlohna hi min lo zirtir se chuan tun ang em em hi chuan a hluar lovang a ti. Mizo ten ei leh in leh zuk leh hmuam a kan insum loh avangin kan taksa-ah natna chi hrang hrang kan vei thin  a ni, a ti. 

September Ni 11 hi misual ten America-a Twin Tower an Bomb  chhiatna cham a ni a. America mipuiin September ni 11 an  theih nghil thei ngai tawh lo  ang hian, Mizoram mipui te pawh hian he kan “Meizuk dona Ni” Septemberni 11 denchhen hian, Vaihlo leh akaihhnuaiin min khawichhiat nasat ziah hre rengin, i do zel ang u, tihin kalkhawm mipuite a sawm bawk.

Anti Tobacco Squad, Saiha ten Saiha khawpui chhung sawrkar department hrang hrang an endikna ah zuk leh hmuam lama fihlim leh titha pathum heng B.D.O.  Office,  Saiha RD Block te, Superintendent of Excise & Narcotic Office te leh Saiha leh Assistant Commissioner of Taxes, Saiha Zone te hnenah Khuallian hian Certificate a hlan nghal bawk a ni.

Mizoram State Anti Tobacco Day-2014 hmanna-ah hian Department hrang hrang hotu-te, Tlawmngaipawl hrang hrang hruaitu te leh veng hrang hrang-a Village Council Member te leh Chanchinthar thehdarh tute an kal tha hle a. Dr Mara S.Thansiami chuan Power Point presentation hmangin zuk leh hmuama Mizoram dinhmun hrang hrang leh State dangte nen Zuk leh hmuam kawnga kan dinhmun a tarlang a. Mizoram chu Tobacco capital of India tih hial a ni tawh thu tarlangin, India ramah  Mizoram chu meizu tamna ber, mahse nghei tum tlemna ber,Cancer tamna ber leh cancer avanga thih tamna ber, a ni thu a tarlang a. Mizoram mipa za zela 73.6% leh hmeichhia za zela 16.1% in mei kan zu a. Zuk leh hmuam phei chu mipa za zela 83.1% leh hmeichhia za zela 60.8% ten kan tih a mek laiin, za zela 2.2% chauhin kan nghei a ni, tih a tarlang a.. Mei zuk hlauhawm zia leh that loh zia mihring taksa-a hna a thawh dan hrang hrang te a lema a entir a ni bawk.

Pi Marilyn Rualzakhumthangi, S.D.O.(S) & Nodal Officer for Tobacco Control, Saiha chuan lawmthu sawina neiin he programme hi a ti tawp a ni.