Animal Husbandry & Veterinary Minister Pu C. Ngunlianchunga chuan vawiin khan Pachhunga University College-ah MULCO Milk Parlor siam thar leh hemi puala ‘Food Safety’ chungchanga seminar buatsaih chu a hawng. He Milk Parlor hi MULCO in Mizorama 10 a siamna a ni.

AH & Vety Minister chuan mipuite tana bawnghnute leh bawnghnute atanga thil siam hrang hrang thianghlim taka mipuite tana chhawpchhuak tura hmalakna in rah a chhuah zel chu lawmawm a tih thu sawiin, PUC zirlai leh College bulhnai vengchhung mipuite tan pawh Milk Parlor chu tangkai taka hman a nih zel a beisei thu a sawi a. Ei leh inah thianghlimna ngaihpawimawh nachang Mizo mipuiten kan hre chho zel chu lawmawm a tih thu sawiin Minister chuan Milk Parlor hawn thar pawh chu uluk taka enkawl zel a nih a beisei thu a sawi.

Minister Pu C. Ngunlianchunga chuan Vety Department hnuaia hmalakna hrang hrangte tarlangin, vawk leh ar ah intodelh thuai theih nan thawh mek a ni a, intodelh tur chuan Sorkar bakah mipuite tawiawmna a pawimawh bawk a ni, a ti a. Zirlaite hnenah chuan Minister chuan kuthnathawh hi eizawnna tlak a nih thu sawiin, taimakna leh remhriatna nen thawh chuan hlawhtlingpui tlak thawh tur tam tak a la awm a ni, a ti. Vawiin hun hi PUC Principal Dr. Tawnenga’n a kaihruai a. Dr. Lalhmingthanga, Managing Director, MULCO chuan technical report pein, MULCO Chairman Pu Vanlalchhunga chuan lawmthu sawiin hun hi a khar a ni. He hunah hian AH&Vety Director Dr. L.B. Sailo leh Department Officer-te, MULCO Board of Director thenkhatte, PUC zirtirtu leh zirlaite bakah College Veng Local Council leh YMA hruaitute an tel bawk. MULCO Milk Parlor sak hi RKVY atanga sum hmuhin AH&Vety Department kaltlanga sak a ni.

Chawhnu lamah technical session-in chhunzawmin, Dr. K. Lalchhandama, Head of Department, Zoology Department, PUC chuan a kaihhruai a. Dr. Lallawmzuali, Asst. Prof, CVSc & AH, Selesih atangin “Food Safety in Public Health” tih paper a buatsaih chu ngaihthlak niin, Dr. H. Lalthanzara, Zoology Department, PUC chuan “Genetically Modified Organisms” chungchang a sawi a ni.