Vawiin khan Mizoram Board of School Education Conference Hall, Chaltlangah PRISM (Promoting Innovations in Individuals, Start-ups and Micro, Small & Medium Enterprises) chungchang inhrilhriatna hun hman a ni a. Hetah hian Higher &Technical Education Parliamentary Secretary Pu H.Zothangliana chu khuallian a ni.
Pu H.Zothangliana chuan mihring thiamna lo thang zelah thil thar hmuchhuaktute’n an thil siam chhuah a taka hman theiha phochhuak tura sum leh pai tam tak an mamawhte phuhrukna tur sorkar laipuiin tanpuina sum leh pai a ruahman chu lawmawm a ti a. Hei hi mithiamte’n an chhawr tangkai thiam phawt chuan an tan awlsamna tam tak a siam thei dawn a ni, a ti. Mizoramah a vawikhatna atan National Institute of Technology (NIT) Mizoram leh Department of Science and Technology in hetiang lam hawi inzirtirna workshop pawimawh tak a buatsaih chu lawmawm a tih thu leh workshop a tel zawng zawng te’n an hlawkpui hle a beisei thu a sawi a ni.
12th Five Year Plan (2012-2017) in a ngaihpawimawh tak,PRIMS hmalakna hi Department of Scientific and Industrial Research, Ministry of Science and Technology hnuaiah kalpui a ni a. He scheme hian a tum ber chu mimal leh pawl emaw, industry te zawk ten thil thar siam chhuah an neih te mipui mimir chhawr tangkai theih tura an phochhuah theih nan sum leh paia tanpui a ni a. India khua leh tui, hetiang lama mitui mi, mimal leh Societies Registration Act, 1860 emaw Indian Trusts Act, 1882 a inziaklut society leh zirna in te’n tanpuina hi an dil thei a ni. Green technology, Clean energy, Industrially utilizable smart materials, Waste to Wealth, Affordable Healthcare, Water & Sewage Management leh hetiang lam hawia thil thar siam chhuah kawngah tha an thawh nasa lehzual a. PRISM hi thawh thuma then niin a thawkhatna Concept/ Prototypes/ Model te pawmsak an nih chuan a bul tan nan cheng nuai 2 thleng tanpuina an dawng ang a. An hlawhtlin dan a zirin tawh hnihna leh thawh thumna thlengin tanpuina sum tam tak an dawng thei a ni.
Workshop hawnna inkhawm ah hian NIT, Mizoram Director Prof.U.C.Ray chuan kalkhawmte lawmna thu a sawi a. TOCIC-CMERI, Durgapur a Advisor ni mek Dr.P.K Chatterjee chuan PRISM nihphung leh thiltumte a sawifiah a. Workshop hi chawhnu pum neih niin state chhung leh pawn atanga kalkhawm mithiam te’n an zirtir a ni.
