3583/2022-2023
Champhai, the 14th February, 2023: District AIDS Prevention & Control Committee (DAPCC), District Hospital Champhai Blood Bank leh Association for Voluntary Blood Donation (AVBD) Champhai District-te tangkawpte buatsaihin vawiin chawhma khan OPD Complex, District Hospital Champhaiah Valentine's Day pual thisen pek runpui blood donation camp leh mipuite inzirtirna awareness campaign huaihawt a ni. He hun hi District Bawrhsap Pu James Lalrinchhana chuan khuallian niin a hmanpui a ni.

Khuallian Pu James Lalrinchhana chuan thalai kalkhawmte chu hmangaihte ni Valentine's Day duhsakna hlanin chibai a buk a. Thianghlimna ngaipawimawh fo tur leh thianghlimna kawnga inzirtirnate ngaihthla liam mai lova a taka nunpuitu nih tum theuh turin a fuih a. Thisen pe thei tura nunkawng hrisel zawh tur leh Valentine's Day pualin hmangaihna dik, thianghlimna ngaipawimawh tura ngaihtuahna thar seng turin a chah a. January 2023 chhungin District Hospital Blood Bank atangin thisen Unit 199 pek chhuah a nih thu leh mamawhna a san hle thu sawiin, vawiin kher ni lo nidangah pawh thisen pe thin turin a fuih a. Kalkhawmte thuawihna nun neia HIV, ruihhlo leh mipat hmeichhiatna laka filhim tum turin a chah a. Mi tha, rinawm leh nunkawng uluk mi nakin zela ram leh hnam innghahna tlak Champhai District-in a mamawh thu sawiin, humsual dai tawhte pawh inlamleta midangte tana malsawmna nih tum turin a chah nghal bawk.

Dr. Krossnunpuii, Blood Bank Officer, District Hospital Champhai chuan 'Thisen pe tura nun hrisel neih dan' tih thupui a sawizau a. Blood Pressure leh Hb level nei tha turin taksa insawizawi that, chaw tha leh hrisel ei bakah nun uluk a pawimawh thu a sawi a. District Hospital Blood Bank chu Champhai leh Khawzawl District tana thisen mamawh lakna pui ber a nih mai bakah, thenawm rambuai avanga pantu an tam avangin thisen mamawhna a san hle thu a sawi a. District mipuite thisen pek kawnga tan la zel turin a chah a ni.

Thusawitu dang Dr. PC Lalawmpuia, Medicine Specialist, District Hospital Champhai chuan 'Sex leh HIV chungchang leh inven a pawimawhna leh, ruihhloin nun a tihchhiat dan leh inven dan' tih thupui a sawifiah bawk a. Inzirtirna nasa tak kalpui tawh hnuah ruihhlo leh HIV a hluar reng chu inenfiahna tham a tlin thu a sawi a. District anga tanlak nasat a pawimawh thu sawiin, HIV vei zingah mipat hmeichhiatna hman khawloh avanga kai an tam ber a, hemi kaihhnawihah hian fimkhur a ngai hle a ni, a ti a. Hriau thianghlim lo inhman tawm atanga HIV kaina pawh a tam thu sawiin, ruihhlo leh a kaihhnawih laka fimkhur turin kalkhawmte a chah a. District Hospital Champhaiah thisen mamawhna a san em avangin mipuite thisen pek ngaipawimawh theuh turin a ngen nghal bawk.

He hunah hian Financial Literacy Campaign neih ni bawkin, Pu Lalchawimawia Sailo, Manager, SBI Champhai Branch hnen atangin kalkhawmte hriat atana pawimawh tak Insurance Scheme leh Education Loan chungchang ngaihthlak a ni bawk.

He hun hi Dr. R. Lianmawia, CMO Champhai chuan kaihruaiin kalkhawmte lawmna thu a sawi a. Dr. Zatluanga, DMS & President, AVBD Champhai chuan lawmthu sawia hun hman a khar hnuah thisen pek runpui blood donation camp neih chhunzawm nghal a ni.

Vawiin District Hospital Champhaia Vanlentine's Day puala thisen pek runpui huaihawt kaltlang hian thisen unit 93; mipa 80 leh hmeichhia 13 ten an pe a. Thisen petute hi Govt. Champhai College Zirlai 80 (Mipa 70 leh Hmeichhia 10) leh 04 Bikers 6 (Mipa 5 leh Hmeichhia 1) te bakah mimala pan mi 7 (Mipa 5 leh Hmeichhia 2) te an awm a. District AIDS Prevention & Control Committee (DAPCC), District Hospital Champhai Blood Bank leh Association for Voluntary Blood Donation (AVBD) Champhaite chuan he hun ngaipawimawha telte leh tlawmngaia thisen petu zawng zawngte chungah lawmthu a sawi a ni.