3584/2022-2023

Ramtuk thla ni 14, 2023: Vawiin khan Valentine's Day 2023 pualin Mizoram State AIDS Control Society (MSACS) ruahmanna angin Lawngtlai District Blood Bank leh Association for Voluntary Blood Donation (AVBD), Lawngtlai te ṭang kawp chuan Lawngtlai DC Conference Hall-ah a thlawna thisen pek runpui (voluntary blood donation camp) an buatsaih.

Lawngtlai AVBD President Pu Elvis Lalthangzuala kaihhruai Blood Donation Camp hawnna hun hmanah Lawngtlai Additional Deputy Commissioner Pu Abraham Beirazi Khithie chu Khuallian niin, thisen pek chu mi dangte tana malsawmna nih theihna kawng ṭha ber a nih thu a sawi a. Khawvel finna sang zelah thil hmuh chhuah ṭha tak tak awm mah se, thisen tluka hlu leh a ai awh zo hmuh chhuah a la ni lo tiin, thisen pek chu doctor ni lo tan pawha mi nun chhan theihna a ni, a ti a. Blood donation camp buatsaih hun nghak kher lo va, mahni remchan dana blood bank-a kal chilha thisen pek uar deuh deuh turin kal khawmte chu a chah a ni.

He hunah hian a huaihawttute bakah, sawrkar official-te leh sawm an nih angin DIET Lawngtlaia zirlai ṭhahnem tak an tel a. Gilead Drop-In Centre-a Programme Manager Pi A. Remruatpuii'n "Sex leh HIV chungchang leh inven a pawimawhna" tih leh, "Ruihhlovin nun a tihchhiat dan leh a inven dan" tih thupui hmanga zirtirna pein, Pu Elvis Lalthangzuala'n "Thisen pe tura nun hrisel neih" tih chungchang a sawi bawk a. Thisen pek chhunzawm nghal a ni.

Vawiina Lawngtlaia Valentine's Day puala thisen pek runpui buatsaihah hian DIET Lawngtlaia zirlaite leh Lawngtlai ṭhalai eng emaw zatin a thlawnin thisen an pe a. Thisen petute hi mipa 52 leh hmeichhia 8 niin, a vaiin thisen unit 60 an pe a ni.

Attachment

  • Loading attachment...