3585/2022-2023
Lunglei the 14th February, 2023 – Valentine’s Day puala a thlawna thisen pek runpui leh Myanmar Refugee Camp, Thaizawl a naupang 300 chuangte'n zirna an dawn theih nana hmalakna ‘Valentine's Day Fair & Concert’, chu vawiin khan MSU leh Lunglei District Aids Prevention & Control Committee (DAPCC) te tangkawp buatsaihin Assam Helipad, Sethlun ah neih a ni a. He hun hi Lunglei Bawrhsap Pi Ramdinliani, IAS in a hawng a ni.

Valentine's Day puala program-ah hian Blood Donation Drive pawh neih tel niin Lunglei khawpui chhung hmun pali – Sethlun Community Hall, HATIM College, Pukpui leh Christian Hospital Serkawn Blood Bank ah te a thlawna thisen pek runpui kalpui a ni.

Hawnna program Pi Laldingngheti Pautu, Secretaty, MSU Regional Headquarters, Lunglei kaihhruaiah Lunglei DC Pi Ramdinliani chuan Valentine's Day chu hmangaihna midangte tana inpekna ni anih angin midangte tanpui tur leh a mamawhtu apiangte hman theih tura thisen pek runpui neih a ni chu inhmeh a tih thu a sawi a. Kan thalaite zingah ruihhlo bawiha tang leh nun uluk lo an tam chu pawi a tih thu sawiin Lunglei DC chuan thalai kalhawmte chu hetiang an nu ti chhe thei hrang hrang laka fihlim tura invawng tlat tur leh an rilru hriselna te enkawl tha turin a chah a. Kalkhawmte chu a thlawna thisen pek uar deuh deuh tur leh mahni pek mai duh tawk lova midang te pawh thisen pek hlutna zirtirtu leh kawhhmuhtu ni theuh turin a chah bawk a ni.

He huna khualzahawm Pi C.Lalremruati, Lunglei DIPRO pawhin thu sawiin Lunglei Medical Superintendent Dr SR Ngurchamliana’n HIV/AIDs awareness chungchang zirtirna a pe a, Pro Pastor V. Lalrozuala’n hunserh a hmang a. Pu Johan PC Lalruatdika, President, MSU Regional Hqrs Lunglei in lawmthu sawina hun a hmang a ni.

‘Valentine's Day Fair & Concert’ ah hian Vety Free Clinic, Free Mental Health clinic, Photo Booth, Children’s Corner, Shooting Range, Burmese food stall, Indian Food Stall te buatsaih niin zan lamah concert neih a ni ang.