Vawiin hi World Aids Day a ni a; Mizoram-ah pawh he ni hi Vanapa Hall, Aizawl-ah Health Minister Pu Lalrinliana Sailo hovin Mizoram State Aids Control Society (MSACS) huaihawtin urhsun taka hman a ni. He ni thupui atan hian khawvel pumah – Getting to Zero tih chu hman a ni a; he thupuiin a tum chu – HIV kai thar awm tawhlohna tura tanlak te; HIV positive-te endawng leh thinhrikna tih tawp te bakah AIDS natna kaihhnawih avanga thihnate tihrem a ni.

Health Minister Pu Lalrinliana Sailo chuan HIV natna hrik chu natna dangte ang thova damlohna chi khat a nih thu sawiin, HIV positive-te enhranna leh thinhrikna rilru kan put thin chu sim a hun tawh a ni, a ti a. Mizoram-ah MSACS leh NGO thahnemngaite hmalakna avanga inkaihhruaina leh inenkawlna mumal taka kalpui a ni chu lawmawm a tih Health Minister chuan sawiin, sawrkarin HIV hrik darh zau tur venna kawngah tha a thlah loh thu leh sawrkar ruahmannate chu chhawr tangkai zak lo turin mipuite a chah a ni.

World Aids Day puala inkhawmah hian HIV positive ni mekte leh hnathawktu dangten anmahni chanchin tawi an sawi a; Mizoram sawrkarin ruihhlongaite leh dinhmun tleute tana pan theih tura Drop-In Centre hmun hrang hranga a din chu lawmawm an tih thu sawiin, HIV positive nih chu nunphung hloh hlenna a nih loh thu leh inenkawl uluk a tul thu an sawi a; doctor-te chawh ang thlapa ART damdawi ei chu damreina a nih thu leh drop-in centre a tlukluh hreh loh a pawimawh thu an sawi bawk.

MSACS Project Director Dr. Eric Zomawia chuan Mizoram-a HIV positive pung ta anga a lanna chhan sawifiahin, “Tunhma zawng aiin mahni thisen test duh kan pun tak avang a ni ber a; chutih rual chuan HIV hrik inkaichhawn kawngah chuan Mizoram dinhmun chu a hniam hret hret zawk a ni” a ti. MSACS chuan tunah hian ART damdawi hmanga HIV positive enkawl lai Aizawl-ah mi 3915; Champhai-ah mi 316 leh Lunglei-ah mi 179 an awm thu sawiin, drug addict 14400 leh KS 1400 bakah Mizoram pawnlam mi (migrants) 29000 an enkawl mek thu Dr Eric Zomawia chuan a sawi. MSACS hnuaiah hian Mizoram district 9-ah thisen test-na leh he natna veite enkawlna hmun dah kim vek a ni tawh a; HIV positive-te tan AAY hnuaiah ration hranpa ruahmansak an ni a; transport department hnuaiah an zin veivahnaa lirthei chuan mana ngaihhnathiamna pawh siamsak an ni.