Nimin dt 30.1.2018 khan Leng khuaa Saihnuna Hall ah bialtu MLA leh Minister of State, Pi Vanlalawmpuii Chawngthu bul tumin Leng khawtlang chuan Mizorama thingtlang khaw inrelbawlna tha leh khaw fai ber an nih lawmna an nei.

He huna khuallian Pi Vanlalawmpuii Chawngthu chuan, Leng khawtlang tanrualna te, hruaitu fel leh vengva tak an neih vangte, mipuiten faina leh khawtlang rorelna tha an duh tak zet vangte in he lawmman ropui tak hi an dawng thei a ni, a ti a. Kawng tinrenga hmalak puia, a tul ang zela tanpui reng thintu E. Lungdar BDO leh Serchhip Project Director, DRDA te hmalakna pawh a chhuanawm hle a ni, a ti. Leng in Missions Antyodaya a lawmman pakhatna an lak mai bakah, Piler khua chu top ten ah a lang pha a. E. Lungdar Block chu Best Block ah thlan a niin Serchhip Project Director chu hmala tha berah (Best PD) puan a ni leh zel a. Kan bial chhung Biate pawh khawpui fai inelnaah pakhatna a nih bakah Champhai District chhunga Village Council hnathawk tha bera thlan an ni a, Khawlailung khua pawh Serchhip District chhunga Village Council thawk tha bera thlan a ni bawk. Kan bial chhungah hetiang lawmman ropui tak tak a ruala a rawn lut ruih ruih mai hi ka lawm a, kan bial hi ka chhuang tak zet a ni, a ti.  Chutihlaiin tun hnaiah E. Lungdarah chhungkaw pali te chenna in kang rala, chu chhiatnaah pawh chuan bial chhung khaw hrang hrangte inphungbawmin theihtawpin an tang tlanga, ka inngaihsak tawnna te hmuh a nuamin ropui ka ti tak zet a ni, a ti bawk. Pi Vanlalawmpuii hian, dik taka hna a thawh theih nana tawngtaipui thin turin mipuite a sawm a, khawtlang hruaitute chu engang mi pawh nise thlei bik a neih ngailoh thu sawiin, lungrual taka tawh hova hmasawn tlan dial dial hi ka duh ber reng a ni, a ti.

Pi Vanlalawmpuii Chawngthu hian Leng khuain Mizoram khaw inrelbawlna tha leh fai ber an lawmna senso  atan hian Rs. 2,00,000 a pe a ni.

He hunah hian Pu VL Remliana, Project Director, DRDA Serchhip pawhin thusawiin, Leng khawtlang tanrualna leh hmalakna zar zovin E. Lungdar Block chuan Best Block lawmman a dawng a, chumi kal zelah Serchhip PD pawhin Best PD an lo dawng ve thei a ni tih thu a sawi a, chutihrualin District chhung khaw hrang hrang te thawhrimna leh tumruhnaah pawh lawmthu a sawi bawk. Mi tam tak chuan Leng khua chu an vanneih bik vanga hetiang lawmman ropui tak hi dawngah an ngai mai thei, mahse he lawmman hi vanneih vanga dawn theih niin a lang lova, a thawha thawhchhuah ngai a ni, tiin Leng mipuite, khawtlang hruaitute leh tlawmngaipawlte hmalakna chhuanawm a tih thu a sawi a ni.

Serchhip Deputy Commissioner aiawha he huna tel Pu Beitlotha Nohro, MCS, SDC/DLAO pawhin thusawina hun hmangin Serchhip Bawrhsap in Leng khaw mipuite a lawmpui thu leh a chhuan thu a sawi a. Amah ngei rawn tel a tum laiin chhungkuain chhiatna an tawk hlauh maia, a ai ka rawn awh ta a ni, a ti a. Bawrhsap aiawhin lawmpuina thuziak leh pawisa a hlan nghal a, tin DLAO Office lawmpuina pawh a hlan nghal bawk.

Nimina khawfai ber lawmna inkhawm hi Leng VCP Pu B. Lalfinga’n a kaihruai a, Pu Lalnghenchhana, Secretary, Village Council chuan report tlangpui a pein, E. Lungdar BDO PU Vanlaltanpuia chuan thusawina hun a hmang bawk a, zaithiam ten hun hmangin tlai lamah an khaw Playground ah ruai an buatsaih nghal a ni.

Nimina khawfai ber lawmna hi Leng khaw mipui leh Leng khawchhuak hmun danga cheng te, Serchhip District chhunga khaw hrang hrang Village Council member te, E. Lungdar BDO thawktute, Serchhip District I&PR thawktute leh Serchhip Cable TV neitute, Lungdar Block chhunga sawrkar hnathawk engemawzatten an hmang a ni.

India sawrkar chuan Missions Antyodaya – Gram Samridi Evam Swachhata Pakhwada hi nikum 1^st -15^th October, 2017 khan intihsiakna hmanga bul tanin a kalpuia. India rama thingtlang khaw 2.6 lakh te chu inrelbawlna tha leh faina (village well being & cleanliness forthnight) ah inelna neih tirin Mizoram ah pawh hei hi kal pui a ni a. State Level lawmman semna hi December, 2017 khan sem niin Leng khua hi pakhatnaah thlan a ni a, Home Minister Pu R. Lalzirliana chuan lawmman Citation leh Rs. 50000 a hlan a ni. He missions in a tum ber chu thingtlang khaw mipuite, an khawtlang thatna kawng tinrenga tha thawh tir leh mawhphurhna an nei tih zirtir leh an thinglunga tuh ngheh ani a. Hmalakna kawng hrang Cleanliness, Gram Sabhas, Comprehensive Public Information System,  Clean and Green, Information, Education & Communication activities, DAY- NRLM  leh thil dang engemawzat hmanga inelna a ni.

Leng khua in hetiang lawmman an lak theih nana an hmalakna hrang hrangte, khawtlang hruaitu leh mi thenkhat te kawmna Mizoram Hmasawnna Lamtluang, I&PR Department buatsaih TV Programme ah rawn tihchhuah thuai a ni ang.