Vawiin khan sawrkar inrelbawlna leh hmasawnna atana vansang thiamna hman tangkai dan tur chungchang zir hona (Mizoram State Meet on ‘Promoting Space Technology based tools and applications in Governance and Development’) chu Secretariat Conference Hall-ah Chief Secretary Pu Lalmalsawma’n a hawng a. He hun hi Indian Space Research Organization (ISRO), North Eastern Space Applications Centre (NESAC) leh Mizoram Remote Sensing Application Centre (MIRSAC) te buatsaih a ni.
Khuallian Chief Secretary chuan intawh khawm buatsaihtute chungah lawm thu sawiin, kawng hrang hranga hma sawnna tura an inpekna leh hnathawhte fakawm a tih thu a tarlang a. Khuarel chhiatna thleng thei hriat lawk nan leh ram leilung hausakna hai chhuah nan vansang thiamna (satellite) chu tangkai taka hman theih a ni tiin, sawrkar laipuiin Digital India, Smart City leh hma lakna dang a kalpui turah pawh space technology chu a kipui pawimawh tak tur a ni, a ti a. State Meet chuan sawrkar leh mipuite tan hlawkna a puak chhuah ngei a beisei thu sawiin, ISRO leh NESAC te pawh Mizoramin a mamawhna apianga tanpui thin turin a ngen nghal bawk.
Hawnna inkhawm hi Planning Secretary Dr C.Vanlalramsanga’n kaihruaiin, kal khawmte lawmna thu a sawi a. Mizoram sawrkar Science and Technology Department-a Chief Scientific Officer Dr R.K.Lallianthanga, MIRSAC-a Member Secretary ni bawk chuan State Meet buatsaih a nih dan a sawi fiah a. September ni 7, 2015-a National Meet on Promoting Space Technology Application-a a thu sawiah, Prime Minister-in chuti ang intawh khawm chu state tina neih tur a tih vanga Mizoram State Meet pawh buatsaih a nih thu a sawi.
NESAC Director Pu P.L.N. Raju-a chuan Indian Space Programme chungchang sawi fiahin, India chuan a ram mipuite’n an chhawr tangkai theih turin vansang thiamna a kalpui thin tih a sawi a. Sawrkar inrelbawlna leh hma lakna kawng hrang hranga vansang thiamna hman tangkai a nih dan te tarlangin, ei leh bar zawn leh ram leilung hausakna hai chhuah kawngah te, khuarel chhiatna leh sik leh sa chungchang zir chian nan te leh hmasawnna hna hrang hrang thawh nan te hman a nih mek thu a sawi.
He intawh khawm hi ni khat awh niin, Mizoram sawrkar Department hrang hrang aiawh te, ISRO, NESAC leh MIRSAC lam mi thiamte an tel a. Thupui hlawm 4 – Environment and Energy, Agriculture & Allied departments, Infrastructure Planning leh Health and Welfare-ah te space technology hman tangkai a nih dan tur chungchang zir ho a ni.
