Information & Public Relations Department leh Mizoram Art Development Society (MADS) bultuma Ni nga chhung awh tur, Amoii Painting Solo Exhibition vawi 3-na Art Novelty Gallery, Chaltlang Venglaia buatsaih chu vawiin khan Chief Minister Pu Lal Thanhawla chuan a hawng.

Chief Minister chuan lemziak lam, art ngaisang leh chawisang duh hnam nih hi hnam changkang nihna a ni a ti a. Mizoten kan talent neihte kan haichhuah thiam a kan tum tak tak phawt chuan mi te aiin kan hniam biklo a ni a ti a. Mi nazawng tih theih loh Amoii’n hetiang painting solo exhibition a buatsaih thei hi a ropui hle a ni a ti a. Thalaite chu nasa zawka hetiang lam kal tura a duh thu sawiin, Pu Hawla chuan hemi lamah hian Mizote hi kan duai biklo a ni a ti a. Sorkar ang pawha hmunpui zawk Delhi ah leh Kolkataah te Mizo kutchhuak painting exhition neih tawh thin anih thu a sawilang a. Sum harsatna avangin duh angin kan chawisang theilo a ni a ti.

Chief Minister chuan talent hrang hrang kan neihte hi inhlutsak tawna inchawimawi tawn hian hmasawnna kan nei thei a ni a ti a. Mizo artists te hnathawh chu ropui a tih thu sawiin, Mizo leh Mizoram hmel pholang thei lemziak te chu sorkarin leisakin, mikhual pawimawh lo zinte hnenah an hlan (present) thin a ni a ti a, mikhualte chuan mawi an tiin, an hlut thei hle a ni a ti. Thalaite talent haichhuahna kawngah sorkar chuan a phak ang tawkah hma a lak zel thin thu a sawi bawk a.

Chief Minister hian MADS hnenah Rs.3 lakhs pein, Amoii hnenah Rs.1 lakh a pe bawk a ni.

MADS hian senior artist pathum Pu Tlangrokhuma, Pu R.Thansanga leh Pu Rosiamliana Ralte te chawimawina thilpek citation a buatsaih chu Khualzahawm Pu Jim K.Chozah, Director, I&PR in a hlan a ni.

Exhibition hawnna inkhawm hi Pu HK Jerry Ramliana, Vice President, MADS in a kaihruai a.

Pi Amoii (LALHMINGMAWII) hian kum 2000 leh 2006 khan solo exhibition alo kalpui tawh a. Lawmman leh chawimawina tum 4 a dawng tawh bawkin, India ram hmun hrang hranga exhibitionah vawi 15 a tel tawh bawk a. Art workshop leh seminar buatsaihna hmun hrang hrangah tum 10 a tel tawh bawk a ni.