“Kan tih than hlui kalsana tih dan thar hman hi Change a ni a. Kan ram kalphung thatna tur atan chuan a tul dan anga Change hi kan hman fo a ngai dawn a ni,” tiin Finance Minister Pu Lalsawta chuan vawiina Federation of Mizoram Government Employees & Workers (FMGE & W) General Conference vawi 29 na Vanapa Hall a neihah a sawi.
Sorkar hnathawkte nen thawhhona tha a awm chuan hnathawh pawh a zangkhai a nga, hmasawnna atana hnathawh pawh a chak phah dawn a ni. Chutiang anih theih zel chuan ram tana hmalakna a thlawn ngai lovang ti a sawiin vawiina khuallian Pu Lalsawta chuan tih tur a tam a, a tak taka thawktu tur chu sorkar hnathawkte an ni a. Chumi sawiho tur leh hmalakna te thlir ho thei a FMGE & W General Conference vawiina a tel theih avangin lawmthu a sawi a. Sorkar function leh programme dang pawimawh ah te Minister leh hotu pawimawhte an kal hian tih tur an neih loh vang a ni lova, mipuite hnena sorkar hmalakna puanzar nan leh inpawhna tha tak a awm theihna tur atan te a ni a. Media ten tha taka sorkar thu leh hla an lo puanzar hian ram mipui ten sorkar hmalakna an lo hria a, chu chuan mipuite leh sorkar ah inlaichinna tha tak a siam a ni a ti bawk.
Pu Lalsawta chuan Federation hi sorkar hnathawk zawng zawng intelkhawmna pawl anih avangin Mizorama hmasawnna thleng tawh zawng zawng chu an kutchhuak a ni a. Hmalama tih tur la awm zawng zawng pawh an thawh tur vek bawk a la ni a. Federation hotute nena vawi engemaw zah an inkawm tawhnaa an sawiho tam tak zingah sorkar in a bawhzui leh hma a lak mekna te a sawi a. Below Povety Line (BPL) tehfung dik leh Baseline Survey; Sorkar tana Economy Measures lakna tura rawtna 14 zing ami engemaw zahah hma lak tawh a nih thu leh Resource Mobilisation chungchanga rawtna ah pawh 6 lai bawhzui tawh a ni a; Winding up/Restructuring of Public Sector Enterprises (PSE) chungchangah thui tak hmalak a ni tawh in Medical Re-imbursement chungchang a fel zawk theihnan a rawtna bawhzui a niin, Chief Secretary hova Committee Report pawh dawn fel a nih tawh thu a sawi.
Er. K. Lalsawmvela, Sr. Vice Predient in programme hi a kaihruai a, Pu J. Ramdinmawia, Secretary General in Secretary report a pe a. Pu R. Lalrammawia, President in thu a sawi bawk. Pu Ramhmangaiha Ralte, Vice President in lawmthu a sawi zawhah MJA te kaihhruaina in kum 2016 - 2017 chhunga hruaitu tur mi 10 thlanna neih nghal a ni.
Chawhnu lamah rorel leh Finance report te ngaihthlak a ni a. Agenda pawimawh tak tak rel ho a ni.
FMGE&W hi 24.11.1973 atanga din niin kum 40 chuang a ni tawh a. Service Association hrang hrang 104 awm in Sub-Hqrs. 7 (Aizawl pawn district tinah) neih a ni bawk a. Member zawng zawng hi 45,000 vel an ni.
