District Legal Services Authority, Mamit buatsaihin vawiin khan Chhim Veng YMA Hall-ah International Women’s Day hman a ni a, District Bawrhsap Pi Lalbiaksangi’n a hmanpui.

Khuallian Pi Lalbiaksangi chuan Khawvel puma hmeichhia te Ni pualin kalkhawm te chibai a buk a, kumin a he ni pual hian United Nation chuan “Planet 50:50 by 2030” tih thupui a thlan thu a sawiin, Kum 2030 ah chuan hmeichhia leh mipa te kawng engkimah kan intluk tlan theih nan UN chuan he thupui hi a thlang a ni a ti a. Khawtlang leh chhungkaw hmasawn nan hmeichhia te tan rual a tul thu sawiin, kan hmeichhiat pui tanpui ngai te leh dawm ngaite puibawm zel turin kalkhawm te a chah a ni.

Vawiin hmeichhiate ni pual hian Mamit khaw chhunga MHIP Branch 6 kalkhawmin, inelna chi hrang hrang neih a ni a, hmeichhe chungchang dan leh dun inhrilhriatna hun neih a ni. Kalkhawm te hian Mamit khaw chhunga hmeichhe entawn tlak ber atan Mamit Sub Hqtr MHIP President Pi Sapliannguri chu an thlang bawk. Hriselna chungchangah inzirtirna Dr. P.C Lalawmpuia’n a pe bawk.

District Legal Services Authority, Mamit Secretary Pi Julie Lalrinzami’n vawiin hun hman hi a kaihruai a. Chawhnu lamah MHIP member te pualin a thlawna inentirna buatsaih a ni bawk.