MJA Champhai District-in (31.12.2017) a kum 30 anih lawmna chi khat atan a vantlang tana tui thianghlim in tur  Darthangvunga Traffic Point Champhai Vengthlang Presbyterian Biak In tuala Rs 1, 81,500.00 (Cheng Nuai khat singriat leh sangnga) chuang seng a siam,  "MJA SIKTUI THIANG" chu vawiin chawhnu dar 1 khan Champhai District Bawrhsap  Pu Vanlalngaihsaka IAS chuan vantlang tana hman theih turin a hawng. 

DC Pu Vanlalngaihsaka chuan faina leh thianghlimna lam a ke penna ni pahfawma MJA in vantlang tana rawngbawlna ropui tak a siam chu fakawm atih thu leh hmasawnna rahbi pawimawh tak anih thu a sawi a. Hetiang rotling siam anih theihna tura Champhai DRDA, BDO, PHED leh P & E Department leh Vengthlang VC te puihbawmna chu fakawm a tih thu a sawi bakah Mipuiten mahni ta anga enkawl zui tur leh tangkai taka hmang turin duhsakna a hlan nghal a ni. 

He hun MJA Champhai District President Pu C. Lalhnunpuia kaihhruaiah hian Champhai PHED WATSAN Circle SE Er. Lalrammawia pawhin thu sawiin MJA Siktuithiang chu Champhai Darthlalang anih thu sawiin, a hmangtu mipuite a zirin hman tangkai anih tur thu a sawi a. Vengthlang Presbyterian Kohhran Committee, Champhai Vengthlang Branch YMA leh PWD-ten he hmalakna kawnga an tha thawhna avangin an chungah lawmthu a sawi bawk a ni. 

MJA Siktui Thiang siamna tur hian Convergent sum hmangin Champhai BDO atangin Rs 100000.00 (Cheng nuaikhat) ruahman a ni a. Hemi bak zawng senso ngai hi MJA Champhai District chuan a tum thung a ni.