Chief Minister Pu Lal Thanhawla kaihhruaina hnuaiah vawiin khan a office Cabinet Roomah Aizawl khawpuia chengte hman tur Vantlang Thlanmual (Common Cemetery) siam dan tur UD&PA Department hmalakna turin meeting neih a ni.

Chief Minister chuan Aizawl khawpui chhung veng hrang hranga thlanmualte hi hun rei tak daih thei anih loh avangin kan zavaia hman tlan tur Vantlang Thlanmual siam a hun tawh thu a sawi a. Meeting-ah hian member kalkhawm ten vantlang thlanmual siam ngei chu tha an ti tlangin, UD&PA department lam hotu ten sawiho tur engemawzah an chhawpchhuak a ni. Vantlang Thlanmual tur hi mitin huapzo, Kristian, Muslim, Buddhist, Jain, Hindu etc te tana siamin, a indaidanna erawh mumal taka siam nise tiin ruahman chhin a ni a. A enkawltu tur bik chhawra, a hmangtu turte pawhin tul ang sum sen nise tiin, mipui tana awlsam zawk nan Aizawl hmar, chhim, chhak leh thlangah te siam nise tih sawiho a ni a. Heng vantlang thlanmual ram te hi uluk taka enkawla, thing phun te, kalkawng siamte, mipui awmna tur ‘shed’ siamte, tui dehna hmun leh inthiarna te siam nise tiin, UD&PA chuan rawtna a siam bawk a ni.

Vantlang Thlanmual tur atana departmentin alo thlithlai te chu South Hlimen 28,79 bigha a zau tihfel tawh, Muanna Veng, Zuangtui - la ngaihtuah mek, Sairang 29.29 bigha a zau tih fel tawh bawk, Falkland venga ngaihtuah mek bawk leh Tuirial Airfield huamchhungah ram ngaihtuah mek bawk ani tih meetingah hian tarlan a ni a. Heng vantlang thlanmual tur ruahman mekte hi Mizoramah chuan thil thar anih avangin policy decision siam turin sorkarin High Level Committee (HLC) ni 7 March 2012 alo din tawh chuan uluk takin ngaihtuah se a ti a. He HLC ah hian member 16, Chief Minister Chairman ni bawk tiamin an awm a. An zingah hian MP 2 (Lok Sabha & Rajya Sabha), UD&PA Minister, MLA 3, Chief Secretary, Principal Secretary 1, Secretary 5, Chairman, AMC, leh President YMA,MUP,MHIP te an tel a ni.

Vantlang Thlanmual siam tur hian Aizawl khawpui chhunga Local Council 81 te zingah 65 in vantlang thlanmual siam tha an tih thu hi UD&PA department an lo hriattir tawh a ni.