Mizoram Journalists’ Association Rising Day vawi 44-na ( 1972 -2017) leh MJA Day lawmna vawiin khan Aizawl Press Clubah hman a ni a. Pi Lalnithangi, Director I & PR Department chu ‘Guest of the Day’ niin MJA member te leh I &PR Department Senior Officer te nen hun hman ho a ni.
Mizoramah Mizo tawng ngeia chhiar tur Chanchinbu thahnemngai taka lo buatsaih hmasatu leh sulsutu te zahna chibai buka thusawiin Special Guest Pi Lalnithangi chuan Laltin leh Bati eng hnuaiah Chanchinthar lakkhawm a,buatsaih leh a sem chhuah thlenga bultan tu ten an lo kurpui na chuan, tunah rah tha tak chhuah in hmanraw changkang zawk nen khawvel tukverh ah dak chhuak phak a hmasawnna hmuh tur lo awm ta chu lawmawm leh hmasawnna ropui tak ani a ti a.Dawhtheihna leh taimakna nen hmathlir zau tak nei chunga hmasawn zel turin MJA Member te chu duhsakna a hlan nghal a ni a. Hmasawnna atana thil tulte inpawh taka sawiho thin chu chhunzawm zel a that thu a sawi.
Pu Vanlalrema Vantawl,President MJA chuan kum upa chu puitling tura ngaih anih angin MJA pawh in puitling kum a hmang chho mek a,he a upat na hi kum lamah nge ziak lamah tih ngaihtuah chunga hmasawn na rahbi a pen chhoh ve zel a ngaih thu a sawi a.Mizoram Chanchinbu chhuakah hian ram pawn lam aiin ram chhung chanchin hi hmatheh a ni zawk thin, hei hian mahni hnam chawisan a tumna a nih ruallin khawvel ramdang chanchin pawh thlur ve tho a tul thu leh a in buk tawka ziah thiam a ngaih thu a sawi a, MJA President chuan MJA hmalak ho na ah a tam thei anga in hmang turin member te a sawm nghal a ni.
Pu Zonunsanga Khiangte Vice President MJA,vawiin MJA Day lawmna kaihruaitu chuan March ni 23 ah Tawrhbawm Office ah pawl din tan anih dan leh he ni hi a hnu zelah MJA member te chuan Day lawmnan emaw General Conference hman nan emaw kum tin a remchan dan anga an hman thin dan a sawi a.Mizoram Journalist Member te zingah chhuanawm tak tak an awm thu leh tuna Chief Minister nimek Pu Lal Thanhawla chu President hmasa ber a nih thu leh an Senior Member Pu Lalbiakthanga Pachuau tuna kum 90 kai tawh phei chu ‘Oldest Working Journalist in India’ ah puan anih thu a sawi bawk. MJA leh I & PR Department atangin thusawi hrang hrang ngaihthlak ho a ni.
