Sansad Adarsh Gram Yojana (SAGY) hnuaia District Level Committee chu Lunglei DC Pi Lalzarmawii, IAS kaihhruaiin vawiin chawhma khan Lunglei DRDA Conference Hall-ah an thukhawm a. Lok Sabha MP Pu C.L. Ruala’n Model Village atana a thlan Haulawng khua ti hmasawn tura ruahmanna, Village Development Plan buatsaih dan tur an sawiho.

Meeting-ah hian Village Development Plan hnuaia line department te thawhho dan tur ruahman a ni a. Hmasawnna ruhrel hrang hrang siam bakah mipui rilru sukthlek thlak tura a huhoa joint awareness neih a pawimawhzia sawiho a ni. Village Council te nen bawlhhawlh paihna tur, dumping area uluk taka enfiah nise an ti a, him dama sawngbawl a nih theih nan mipui zirtirna pek nise an ti bawk.

Baseline survey, Participatory Rural Appraisal (PRA) exercise leh Village Council atangin Haulawng khua tan hmasawnna awm thei tur te lakkhawm a nih hnuin, Committee hmaah Village Development Plan-a telh turin chhawp chhuah an ni a. Heng hmasawnna awm thei tur te hi Line Department ten an Village Development Plan-ah telh in, April ni 15 aia tlai lova thehlut tur hriattir an ni.