158/2024-2025 

Champhai, the 12th April, 2024: General Election to Lok Sabha, 2024 atan tukin atang khan Champhai District-ah kum 85 chunglam leh rualbanlote tan in lama vote thlak (home voting) kalpui tan a ni. Champhai District chhunga Assembly Segment (AS) 3; 23- Champhai North AS, 24-Champhai South AS leh 25-East Tuipui AS hnuaia home voting buaipui tur Mobile Polling Party 16 te thlahna hun tukin dar 7:00 khan District Election Officer Pu James Lalrinchhana hovin DC Pisa tualah neih a ni a. DEO hian Home Voting buaipui turte fuiha duhsakna hlanin a vailiam a ni.

District Election Officer Pu James Lalrinchhana chuan Champhai District-ah training tha tak zawhfel a nih hnua home voting kalpui tan a ni chu lawmawm tiin phurawm a tih thu a sawi a. Home voting buaipui tura ruat Mobile Polling Party-te chu Champhai District-a election hmahruaitu an nih thu sawiin, democracy hlawhtlinna leh chawilar zel nana mi pawimawh tak tak, training leh hmanraw tha tak tak pekte an nih vangin harsatna an tawh loh a beisei thu a sawi a. Secrecy of voting ngaipawimawha hawihhawmna leh dawhtheihna nena home voting hna hlen chhuah tum turin a fuih a. Inrintawkna nen phur deuha mawhphurhna tihhlawhtlin tum turin a chah a; harsatna an neihte hotute hrilhhre nghal zel tura chahin, tanpui turin election hotute an inhawn reng thu a sawi bawk.

Home voting buaipui turte thlahna pual hun tawi hman hi Pu Benjamin Zalawma Ralte, Election Officer chuan a kaihruai a. Pu Lalmalsawma Hnamte, Addl. SP leh Postal Ballot Nodal Officer Pu N. Lalzarzova, BDO Khawbung/ALMT te'n home voting chungchanga hriattur pawimawhte an sawi a ni.

He hun hi Pu Lalrinawma, Nodal Officer, EEM & PD, DRDO, Pu K. Zorammuana, Dy. DEO & Addl. DC leh Official dangte'n an telpui bawk a ni.

Tukina Champhai District-a home voting bultanna hi District Election Officer Pu James Lalrinchhana chuan telpuiin Champhai District-a voter upa ber leh home voting hmanga vote thlak hmasa ber Pi Biakliani (Kum 103), Rahsi Veng, Champhai Vengthlang leh home voting hmanga PwD vote thlak awm chhun Nl. Vanlalzawni (Kum 40), Champhai Bethel Veng te chu an chenna inah tlawhin democracy chawinun zel nana midangte tana entawntlak ni tura vote an thlak chu fakawm tiin lawmthu a sawi a. Election Commission of India-in mahni in luma vote thlak theihna, home voting kaltlanga hmalak a nih thu hrilhin, hei hian sawrkarin vote thlak a ngaihpawimawh zia a tarlang a ni, a ti bawk.

In lama vote thlak theite hi kum 85 chunglam leh rualbanlo, PwD E-Roll database a chuang 40% benchmark certificate neite an ni a. Ruahman dan chuan Champhai District-ah vawiin bakah hian naktuk April ni 13, 2024 hian in lama vote thlak turte panchilha postal ballot hmanga vote thlaktir an ni dawn a. Rokhawlhna avanga voter awm remchang lo an awm a nih chuan April ni 15, 2024 hian neih leh tum a ni. Vote thlak lai hriatpui tur hian Candidate-te chu booth pakhatah aiawh pakhat zel tirh phalsak an ni.

Champhai District-ah home voting dilna lut pawmsak mi 134 an awm a; heng zinga 133 hi kum 85 chunglam niin, rualbanlo 1 a awm a. 23- Champhai North AS ah 51, 24-Champhai South AS ah 59 leh 25-East Tuipui AS 24 te an awm a ni. Home voting kalpui tur hian Mobile Polling Team 16 ruat an ni a; heng bakah hian reserve team 4 ruat an ni bawk a. Team tinah hian member 4, Polling Official 2, Microobserver 1 leh Security Personnel 1 zel an awm a ni.