No.3575/2020-2020

Pi Maria C.T Zuali chuan "VC te chu Mizo lalte thlaka khawtlanga roreltu an nih avangin khawtlangah an pawimawh em em a ni" a ti a. An thuneihna beitham mahse Sawrkar inrelbawlna pawimawh tak hmasawna ruhrel siamtu pawimawh tak an nih thu a sawi a, vawina tlangzarh tak Champhai District Village Council Final Electoral Roll, 2020 chu mumal taka hearing nei hmasaa buatsaih a nih thu leh uluk taka endik a nih avangin felfai tak a nih a beisei thu sawiin a tlangzarh a, Party hrang hrang aiawhte theuhte hnenah a copy a sem nghal a ni.

Pu Mark Lalthanliana Addl DC chuan inthlanna thianghlim leh felfai tak neih a nih theihna turin NGO te leh Party hrang hrangte chu thawhhopuiah sawmin District dangte entawn tlaka inthlanna buatsaih a nih theihna tura theihtawp chhuah turin a sawm bawk.

He tlangzarh inkhawm-ah han Election Officer Pu Lalnunfela Chawngthu chuan Champhai District chu Khawzawl district a pian tak avangin Assembly Constituency 3 chauh a nih tawh thu leh Champhai North A/C atangin VC 6 Khawzawl District-ah an beh thu a sawi a. Vawiina tlangzarh tak Champhai District Village Council Final Electoral Roll, 2020 chu Draft Roll aiin mi 65-a Voters an tam thu sawiin, VC inthlan neih hunah vote thlak turte innekchep lutuk lova Social Distancing kalpui a nih theihna turin Voters awm tamna khaw 9-ah Polling Station 2 siam a nih tur thu leh VC thar 2 a pian dawn thu a sawi bawk. Khaw pathumah VC member pung tura beisei a nih thu sawiin " Dinthar leh Vapar-ah VC member 3 atangin 5-ah leh Kahrawt-ah VC 5 atangin 7 ah an pun beisei a ni" a ti bawk.

Vawiina tlangzarh tak Champhai District Village Council Final Electoral Roll, 2020-a tarlan a nih danin Champhai District chhunga VC 62 ah Voters 50,452 an awm dawn a ni. 23-Champhai North A/C ah VC 17 awmin Polling Station 21 a awm a, In 4,862 awmin Voters 16,236 (Mipa 7,844 leh Hmeichhia 8,392) te an awm bawk. 24-Champhai South A/C ah VC 20 awmin Polling Station 24 a awm a, In 6,076 awmin Voters 19,054 (Mipa 9,194 leh Hmeichhia 99,05) te an awm bawk. 25-East Tuipui A/C -ah VC 25 awmin Polling Station 25 a awm a, In 4,639 awmin Voters 15,162 (Mipa 7,628 leh Hmeichhia 7,534) te an awm bawk.

Champhai District Village Council Final Electoral Roll, 2020 tlangzarh inkhawmah hian District Election Official-te bakah Party hrang hrang aiawhte leh Chanchinbumite an tel a ni.