No.3574/2020-2020

Tukin zing khan School Education Minister Pu Lalchhandama Ralte chuan Khawbunga lirnghingin a tihchhiat hmun hrang hrang a tlawh a. Pu C.Lalmuanpuia MLA in a tawiawm a ni. Minister sawm angin Leilung lam zir mi mithiamten Tuipui ral hi an cham chilh zui dawn.

Minister hian Khawbung a chamchilh laiin nizan dar 8:10-ah lirnghingin Tuipuiral hi 4.6 magnitude a nain a sawi a, a hnuah zawi deuhin a nghing leh bawk. Tukin zing khan Minister leh MLA te hian lirnghingin hmun hrang hranga thil a tihchhiatte khawtlang hruaitute nen an en kual a, lirnghingin a tihchhiatte hi a tam ber chu a sak dan dik tawk lo leh building hlui deuh tawhte a ni tih an lo hrilh.

Minister sawm angin Mizoram University, College leh MIRSAC a leilung lam zir mithiamten nimin khan Khawbung hi an thleng a. Hengte hi - Dr J.Malsawma MZU, Dr Paul Lalnuntluanga MZU, Dr C.Zoramthara HoD Zirtiri Sc. College, Dr C.Lalremruatfela Zirtiri Sc. College, Pu Malsawmdawngliana Scientist MIRSAC, Pu Benjamin Lalremsiama Lunglei College te an ni a. Heng mite bakah hian Minister ruahmannain Zofa Consultancy Services ten thil chhiat dan an thlir zui dawn bawk a ni. Leilung zir mi te hian hmun hrang hrang an tlawh kual ang a, hmanrua an ken hmangin leilung chet dan chu an en ang a, ramdanga mithiamte nen pawh a tul angin an sawi zui dawn a ni.

Pu H.Lalnunmawia Principal HSS chuan lirnghing dan report a pekah June 22, 2020 zing dar 4:10 a lirnghing hmasa ber atanga chhiarin vawi 82 a nghing tawh a, Samthang-ah chuan vawi 106 a nghing ni a chhinchhiahte pawh an awm tih a sawi. A khat tawkin na deuh leh na vak lovin a nghing a. Tlema hlau lo deuh ten kan han inthlamuan a, a thlamuantu pawh kan muang chuang teh vak hlei lo. Hmundang atanga min thlamuan tur an lo kalin min thlamuan viau thin, an haw hnu lawkah a nghing zui duh riau a, kan muang lo leh thin tih te Minister hi an lo hrilh a. Khawtlang hruaitute chuan lirnghing avang hian hnathawh leh thiltih an thulh phah lem lo tih an sawi a. Farkawn leh Khawbung inkar leilet zawla riakte chuan leilung che thawm ni awm tak thawm hi an hre deuh reng a, helai bawr hi a chang chuan epicentre te pawh a ni tih an sawi.

Minister-in Khawbung khaw chhunga lirnghingin a tih chhiatte a tlawh kualnaah hian Pu C.Lalnuntlanga Executive Member Sinlung Hills Council, Pu F.Zosanga Chairman PIGFED, Pu Lalhmachhuana SPD Samagra Shiksha leh Champhai District a sorkar mi pawimawh ten an tawiawm a ni.

Attachment

  • Loading attachment...