No.3573/2020-2020

Lunglei District huam chhunga Department zawng zawng-te hmasawnna hnathawh Development Project/ Schemes/ Programmes te zir hova hmalak ngaite sawiho turin vawiin khan Lunglei HPC Conference Hall-ah HPC Vice Chairman Pu Lawmawma Tochhawng leh Planning Secretary Dr C. Vanlalramsanga te kaihhruaiin ni hnih awh ‘Review Meeting’ neih tan a ni. He hunah hian Lunglei DC Pu V.Lalsangliana, Planning Director Dr Lalrinchhana leh official dangte bakah HPC Lunglei member-te an tel a ni.

HPC Vice Chairman Pu Lawmawma Tochhawng chuan ni hnih awh Review Meeting-ah Lunglei District huamchhunga Department zawng zawng te tel tura hriattir an nih thu sawiin he Review Meeting hian a tum ber chu Department hrang hrang te hmalakna chiang taka hriat a, an harsatna neihte sutkian theih dan ngaihtuah hova, a theih ang ang District level-a chinfel tuma, chin fel mai theihloh te State Sawrkar hotute hnena thlen sak a ni, a ti a. Review Meeting chuan Department-te inkarah tawhhona tha zawk a thlen ngei a beisei thu sawiin he meeting kaltlang hian Department hranin hna thuhmun anlo thawh (duplication) lo awm thei te leh hmalak tlan (convergence) kalpui theihna te pawh hriat a awlsam zawk dawn a ni, a ti a. Dik lohna leh tlin lohna hai chhuah tumna anih loh thu sawiin Department hotute chu an hnathawh dan tlangpui leh an harsatna neih te zalen taka tarlang turin a chah a ni.

Ni hnih awh Review Meeting-ah hian Department hotute a mal mala lutin an Department theuh hnathawh mek leh hmachhawpte chipchiar taka zirho a ni a. He Review Meeting tur hian HPC Lunglei Office-in Department-te a hriattir angin report anlo thehlut lawk tawh a ni.

Vawiin a ni khatnaah PWD (Building), PWD Lunglei Division, PHE Rural Watsan, P&E Power Maintenance Division-I & II, UD & PA, I&WR, Agriculture, Horticulture leh Fisheries Department hmalaknate thlirho a ni a. Naktukah EF&CC, DRDA, BDO Lungsen, BDO Lunglei, DRO, LGC, SWD, DLAO, 2nd Battalion MAP, SSA te bakah Nil Report thehlut Office 35-te an tel dawn a ni.