No.3572/2020-2020

Lawngtlai, Vawkhniahzawn thla ni 29, 2020: Vawiin khan Lawngtlai DC Conference Hall-ah Bawrhsap Dr Andrew H. Vanlaldika, MCS hovin Lawngtlaia Independence Day 2020 hman dan tur rel a ni a. Sawrkar department, VC Association, District MJA leh pawl hrang hrang ai awhte an tel.

Chairman Dr Andrew H. Vanlaldika chuan COVID-19 hri leng vangin kum dang angin Independence Day chu hman theih a ni dawn lo tih sawiin, state sawrkarina hman dan tur a ruahman dan a sawi fiah a. Ram ni pawimawh a nih ang ngeia khunkhan tak si, COVID-19 laka fimkhurna dan zawm chung sia hman dan ngaihtuah turin kal khawmte chu a sawm a ni.

Meeting chuan kumin Independence Day lawmna hi Central YLA Playground-ah zing dar 8:00-ah hman ni se, tiin a rel a. Kum dang anga sikul naupang atanga parade contingent beisei a rem loh avangin guard of honour leh ceremonial parade atan Mizoram Police Armed Contingent leh Samagra Shiksha Pipe Band te beisei an ni.

District tihmingthatute chawimawina leh department bilin lawmman sem tur an neih angte he hunah hian sem tura ruahman ni se, tih a ni a. Lawngtlai khawpui chhunga damdawi in pathum, chhawmdawlna in leh District Jail-ah te Independence Day pual tanpuina thilpek pek leh ni se, tih a ni bawk.

Independence Day lawmna atana thil pawimawh hrang hrang bawhzuia hma la turin Technical Committee din a ni a. Department leh tlawmngai pawlte kovah mawhphurhna hrang hrang nghah a ni bawk. Independence Day lawmnaah hian sawrkarin a ruahman angin sikul naupang leh mipui nawlpui tel lova hun hman a ni dawn a ni.

Independence Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a.

Kum danga Independence Day lawmna puala tournament buatsaih thin chu COVID-19 boruak avangin buatsaih a rem dawn lo a ni.