Vawiin khan a vawikhat nan Chhangphut Field ah Mizoram Premier League khelh a ni ta. Vawiin inkhel hmasa zawkah Aizawl FC leh Chanmari West inkhelin, Lalthakima Aizawl FC defender in an mahni lama a tih goal hmangin Chanmari West hian si khat faiin Aizawl FC an hneh ta a ni.

Match hnihna inkhelh hma hian inkhawm tawi neih niin, Pu C Hualrikhuma, President CDFA chuan kaihhruaiin Pu Lalthanzara MFA President chuan thusawiin, Champhai ngeia MPL khelh ani ta chu lawmawm atih thu sawiin, Mizo thalai te hi Mizoram mai nilo India ram club hrang hranga khel thei khawpa thiam an tam tawh thu sawiin,tunah pawh hian India ramah chuan Mizoram hi Football ngainatna ram tia hriat lar kan nih tawh thu sawiin, Champhaia inkhel tura lokal team 8 te chu tha taka khel turin duhsakna a hlan nghal bawk a ni.

Hemi hnu hian vawiin atana match hnihna MPL Season 5 a Table a hmahruai mek tu Bethlehem Vt leh pahnihna Chanmari FC te inkhel velehin, Chanmari FC hian 4-1 in hnehna an changa, Chanmari tan Fela Zote goal 2, Sawmfela goal khat leh Rammawia goal 1 hmangin hnehna an changa, Bethlehem VT tan PC Zosanga'n goal khat a khung ve bawk.

Naktuk hian MPL Round 7 hi khelh chhunzawm leh a ni dawna, Match hmasa zawk dar 12 ah Ramhlun North leh Chhinga Veng FC ten an khel anga, chawhnu dar 2:30 ah Dinthar FC leh Zo United ten an khel veleh ang.