3982/2023-2024

27th February, 2024 : Sawrkar Laipui Ministry of Information & Broadcasting sum cheng nuai 100 senga ‘Experiential Learning Centre (ELC)’ Champhaia din tur chungchang ngaihtuahin vawiin khan ELC Management Committee te chu an Chairman Champhai DC Pu James Lalrinchhana kaihhruaiin Champhai DC Conference Hall, Keifangtlangah an thukhawm. Champhai ELC hi Mizorama ‘Experiential Learning Centre (ELC)’ hmasa ber tur a ni.

He hunah hian ELC Management Committee Chairman Champhai DC Pu James Lalrinchhana chuan ELC chungchang sawizauna hun a hmang a. ‘Experiential Learning Centre (ELC)’in a tum ber chu naupangte leh thalaite tana technology thil thar hrang hrang an inzir theihna tur hmun ruahmana, hmanraw hrang hrang chhawpchhuah sak a ni a. He ELC ah hian Augmented Reality, Virtual Reality leh Metaverse khawl hrang hrangte dah a ni dawn a. Sawrkar Laipui Ministry of Information & Broadcasting sum cheng nuai 100 senga ruahman tur a ni a, 100% Central funding niin, State Sawrkar in he project atan hian insen ve a ngai lova. A enkawl chhunzawmna leh khawl repair leh thawktute hlawh te chu amaha intum thei tura beisei a ni thung a ni. He ELC din na tur hian tun dinhmunah sanction tih fel tawh niin cheng nuai 50 dawn tawh a ni a ati.

ELC Management Committee Chairman Champhai DC Pu James Lalrinchhana chuan tunlai khawvel changkang chho zelah information technology lama hmasawnna hrang hrangte thangtharten an inzir ve zel a tul thu sawiin, ELC chu Champhai District-a zirna ti hmasawn tu hmanraw pawimawh tak ala nih ngei a rin thu a sawi a. Zirlaite ah Science and Technology leh information technology lama tuina leh thiamna a thlen ngei a beisei thu a sawi bawk. ‘Experiential Learning Centre (ELC)’ Champhai District-a din anih theihna tur hian kum tam tak Sawrkar Laipui Ministry of Information & Broadcasting hotute a dawr thu pawh sawi ani.

Vawiin meeting ah hian Pu Moses Lalfakawma Tlau, SDC chuan ‘Experiential Learning Centre’ dah tur khawl te hi Power Point Presentation hmanga sawifiahna neiin. Heng khawl Fast Moto X Bike 17, Bike Racing super Bike, 9D VR 360, EGG VR, VR HTC Arena Without fence, Car Racing Out Runner Deluxe -32, Holo World, online UPS leh CVT te dah tur ani a, supplier atan Bell AtoZ Pvt. Ltd, New Delhi chu committee chuan a thlang ni. ELC hi CHANEM Building, 2nd Floor ah dah a ni dawn a, a hmuhma cheibawl hna hi UD&PA Engineer-te enkawlna hnuaiah chak taka kalpui mek ani. Vawiin meeting zawh hnu hian a hnathawh kal mek leh hma lak zel dan tur enfiah in ELC Management Committee chu a hmunah an kal ani.

ELC Management Committee Champhai District ah hian DC Office-a Officerste, UD&PA, School Education, I&PR, NIC officials-te telin, Sub Hqrs YMA leh MHIP hruaitute an tel bawk a ni.