3981/2023-2024

Aizawl the 27th February, 2024 : Vawiin khan School Education Minister Dr. Vanlalthlana’n rampum huapa lawmman late lawmpuina leh Smart City hmalaknaa Primary School 121 te hnena computer set semna Govt. Mizo High School tualzawla neih chu khuallian niin a hmanpui.

Minister Dr. Vanlalthlana chuan he hunah hian thusawiin Red Ribbon National Quiz Competition-a lawmman latu PES Republic naupangte leh zirtirtute, National School Band Competition-a lawmman pathumna dawngtu Govt. Mizo High School te chu an thawhrimna chhuanawm a tih thu leh a lawmpui thu a sawi a. Smart City hmalaknaa Primary School 121 ten Computer set an dawng chu a lawm thu a sawi bawk. Minister chuan zirlai kalkhawmte chu lehkha ziak tam turin a fuih a, lehkha ziah tam hi chhiar ngawt ai chuan thluaka inkhawl chin a lo tam a, mamawh hunah a lo chhuak ?hin a ni a ti. Mi hlawhtlingte hi an hlawhtlin hnuah nawm hmel deuhin kan hmu a, an thawhrimna kan hmuh hmaih ?hin tih sawiin phur thuta mi hlawhtling ni tum ngawt chi a ni lova, a kalkawng tum ruhna leh thawhrim peihna lai tak kha a pawimawh lai a ni a ti. Minister chuan zirlaite chu an nun kawng zawh mekah risk la ngam tur leh huaisen taka kal ngam turin a fuih a, khawvel hian mi dawihzep an hre reng lo, huaisen te erawhchu an hre reng thin a ni a ti. Hnathawh duh zawng thlan thu-ah pawh huaisen taka ngaihtuahna hmanga sang deuh hlek nih tum turin a fuih. Mi hlawhtlingte leh mi hausate hi an kalkawngah vawi tam tak hlawhchham thin an ni tih hriaa harsatna kara beidawng mai lo turin a fuih bawk.

He huna Khualzahawm Commissioner & Secretary School Education Pi Lalzarmawii pawhin thusawiin Red Ribbon National Quiz Competition-a lawmman pakhatna latu PES Republic te leh National Band Competition-a lawmman pathumna dawngtu Govt Mizo High School band-te thawhrimna chu chhuanawm a tih thu a sawi a. Samagra Shiksha kaihhruainain a phak loh Primary school 121 ten Smart City hmalaknaa computer set an dawng pawh a lawmpui thu a sawi a. Pi Zarmawii chuan zirna hian a huam chin a zau tawlh tawlh a, classroom pindan pakhata inkhung mai a tawk tawh lova, NEP 2020 hian huamzau zawka ramchhunga zirna kalpui hi a tum a, chumi tur chuan ngaihtuahna pawh hman thiam a tul a ni. Vawiina hun hman hian kalkhawmte chu ngaihtuahna thar neih tir se, ram zirnaah hma sawn tirtu leh tanlakna thar petu a nih ngei a beisei thu a sawi bawk.

National level-a intihsiaknaa lawmman late lawmpuina hun hmanah hian Pu Lalsangliana Director, School Education Department chuan kalkhawmte lawmna thu a sawi a, Pu Lalhmachhuana, State Project Director, Samagra Shiksha chuan keynote address a sawi bawk.

Red Ribbon National Quiz Competition January 12, 2024, Jaipur Rajasthan-a tel Presbyterian English School Republic Veng zirlai pahnih Zonunsangi, Class VIII leh Janet Malsawmpuii, Clas IX te chuan lawmman pakhatna an dawng ve ve a; State level, Regional level leh National level-ah lawmman pakhatna an dawng vek a ni. National School Band Competition January 22, 2024-a Major Dhyanchand National Stadium New Delhi-ah neihah Govt Mizo High School Pipe Band Boys chu pathumna an ni a, hemi hma hian Zonal Band competition Bhubaneswar-a neihah pakhatna an lo ni tawh a ni.

Vawiina lawmman late lawmpuina leh computer set semna hunah hian School Education Department Officer-te SCERT, MBSE leh Samagra Shiksha officer-te Govt Mizo High School zirlai leh zirtirtute, lawmman dawngtu PES Republic zirlai leh zirtirtute, Mizoram Primary School Teachers Association hotute an tel a ni.