Vawiin khan khawvel pumpuiah Tuberculosis (TB) Day  chu 'TB titawp turin i tangrual ang u' tih thupuia hmangin neih a ni a. He ni pawimawh tak puala Mizoram chhunga programme lianber chu Health Minister Pu Lal Thanzara hovin Chanmari YMA Hall ah hman a ni.

Health Minister Pu Lal Thanzara chuan T.B. natna lakah Mizoram mipuite an himna tura sawrkar hmalakna hrang hrangte bakah TB natna vei te enkawl dam an nih theihna tura sawrkar hmalakna te a tarlang a. Sawrkarin chak zawka hma la zelin  tunah chuan Revised National TB Control Programme chu State AIDS Control Soci­ety, National Tobacco Control Programme leh Non Communicable Dis­ease te nen an thawk ho mek a ni, a ti a. Pu Lal Thanzara chuan "HIV veite thihpui tam ber chu TB a ni tih hriain sawrkar chuan hmalakna thar pawimawh tak a ti chhuak a. TB leh HIV vei kawpte chu ART cen­tre atangin HIV damdawi bakah TB damdawi pekchhuah tel thin an ni. Health Care Provider Surveillance te nei tura ruahman a ni a, Damdawi In leh Sub-Centre a thawktute pawh TB an vei leh veiloh hunbi neia check-up thin an ni ang" tih a tarlang.

 RNTCP kaltlangin kum 2016-ah in kaihhruaina thar Technical & Operational Guidelines zulzui in Mizoramah pawh hma a la chho mek tih a sawi a. TB hmuhchhuahna khawl thar CBNAAT- TB pangngai bakah drug resistant TB (Rifampicin Resistant te) hmuhchhuahna khawl  pawh Aizawl, Champhai, Kolasib, Lawngtlai, Lunglei, Mamit leh Siaha ah te bun niin TB natna vei te chu RNTCP hnuaiah a thlawnin damdawi an dawng thei a ti a.

Health Minister Pu Lal Thanzara chuan Sawrkar hmalakna chauh chu TB ti tawp tur chuan a tawk lo tih sawiinTB avanga thihna leh tawrhna tihtawp a lo nih theih nan sawrkar, private sector, NGO leh mimal tinte tanrual a hun takzet tih a tarlang a. "TB kan do hneh theihnan kan ramah TB vei engzah nge awm tih kan hriattlan leh TB vei te an awm a nih chuan a ranglama sawrkar hrilhhriat hi kan zaa mawhphurhna" a ni a ti.

Vawiin a World TB Day programme hi Dr. F. Lallianhlira, Director, Health Serivces in a kaihruai a. He hunah hian Health Minister Pu Lal Thanzara chuan Health Care Provider Surveillance a hawnna a nei a. Dr. Vanlalfela, State TB Officer in World TB Day hman a nih chhan leh TB donna chungchanga hriattur pawimawh tarlanna hun a hmang a. Pu Lalrinliana Fanai, Commissioner& Secretary, H&FW leh Dr. K. Ropari, Principal Director, H&FW te pawhin thusawina hun an hmang a. Health Secretary hian Zuangtui, Chhinga Veng leh Rangvamual Sub Centres hnenah ah TB enkawlnaa hmalakna thazual lawmpuina a hlan  nghal a ni.

Report in a tarlan dan chuan India ramah kum 2016-ah khan mi nuai khat zelah mi 217 in TB vei anga chhut a ni a. Kum 2016 chhung khan Mizoramah TB vei damlo 2149 an awm a; chung zinga 11.70% chu HIV+ ni tel an ni. Mizoramah Microscope hmanga TB natna hrik entheihna hmun 35 a awm mek a. TB natna vei hi hriatchhuah a nih phawt chuan sawkarah Report ngei ngei tur a nih thu tarlan a ni a.

TB natna rawn lanchhuah dan tlangpui a hnuaia mi ang hian tarlan a ni-

1.Chawlhkar 2 emaw a aia rei khuh

2.Taksa rihna tlahniam

3.Chaw ei tuilo

4. Tlai lama khawsik ser ser

5.Awmchhung na

6.Zan mut laia thlanfim tla