1685/2023-2024

Lunglei the 29th August 2023 : Vawiin chawhma khan UD&PA leh Lead Bank te tangkawpin Street Vendors te tana PM Street vendor’s AtmaNirbhar Nidhi (PM SVANidhi) loan puk chungchang inzirtirna hun Convention Centre Lunglei ah neih a ni.

Street vendors te tana loan puk inzirtirna hun hmannaah hian Pi B.Vanlalhriatpuii, Manager SD&I, DAY-NULM UD&PA Lunglei chuan thusawiin PM SVANidhi loan hi kum 2021 khan India Prime Minister Pu Modi’an a tlangzarh tawh a Covid-19 leng avangin kum 2024 thleng pawhsei niin khawlaia nepnawi zuar in pho te leh chawhmeh zuar in pho License nei te tana he scheme hi siam a nih thu sawiin, he scheme hmanga loan la te chu sorkar laipuiin 7% a rulh sak dawn tih a sawi bawk a ni.

Pi Lalramnghaki Pachuau, Chief Manager, SBI Lunglei pawhin thusawiin India ram hmun hrang hrangah PM SVANidhi loan hmangin mi tam takin ei leh bar zawnna kawngah nasa takin hma an sawn tawh thu sawiin, Mizoram ah pawh kan hmel hriat chho ve zel chu lawmawm a tih thu a sawi a, tunah hian Lunglei District ah mi 95 in loan vawikhatna la an awm mek a vawihnihna la hi mi 31 awm mek bawk a, vawi thumna la tawh hi mi 2 an awm mek a ni a ti. Pi Lalramnghaki Pachuau chuan Bank ah harsatna an neih te thlen hreh lo tur leh engtik lai pawha puih an in huam reng thu a sawi bawk.

Pu C.Sawihlira, DUDO, UD&PA, Lunglei pawhin thusawina neiin, vawiin a street vendor lo kal khawm te chu an vanneih thu sawiin loan hi mi na zawng pek chi a nih loh thu leh vawiin lo kal te chu bank lamin an mahni ngei loan la tura an sawm chu thil lawmawm tak a nih thu a sawi a ni. Kan loan lak te a hun taka kan rulh hian min puk tir tu bank te tan pawh loan pek leh a chakawm thin avangin loan la te pawhin a hun takah a rulh dan tur ang taka rul theuh turin a chah bawk a ni.

Vawiin PM SVANihi Loan Camp ah hian loan la duh nghal te tan State Bank, Apex Bank, Rural Bank ten a hmunah an buaipuisak nghal thei in Bank Account nei lo te tanah pawh hawnsak nghal thei turin a hmunah hian thawktute an awm nghal vek a ni.

PM SVANihi Loan hi vawikhat lakna ah Rs 10,000/- lak theih niin, vawihnih laknaah Rs 20,000/- ah pung chho in vawi thum laknaah Rs 50,000/- ten a lak theih a ni.  Vawikhat lakna hi thla sawm pahnih (12 Month) rulh tur a tih niin, vawihnih la te tan thla ruk atanga thla sawmpariat (6-18 Month) chhung rulh tur ni bawkin vawithumna la te tan thla sawmthum paruk (36 Month) chhung rulh tur a hun pek an ni bawk.