1686/2023-2024

Aizawl, 29th August, 2023 : Vawiin khan Manipur tualchhung buaina avanga Mizorama rawn tlanchhiate(IDPs) tanpuina sum hman dan tur chungchang sawi hovin Executive Committee on IDPs of Manipur in Mizoram chu Chairman Pu H.Lalengmawia, Commissioner & Secretary Home Department hovin Forensic Science Laboratory Confference Hall-ah an thu khawm a.

Pu H.Lalengmawia chuan Manipur tualchhung buaina avanga Mizorama rawn tlanchhiate chu Mizoram sawrkar leh mipuiten an ensan thei lo va. Anmahni lo tuam hlawma, a tul anga lo chhawmdawl turin sawrkar leh pawl hrang hrangte, mimal te pawhin theih tawp an chhuah a ni, a ti a. Heng IDPs te enkawl nan hian sum leh pai harsatna karah Mizoram sawrkar Finance Department chuan vaibelchhe 5 a pe chhuak tawh a. Hei bakah hian sawrkar hnathawkte atangin vehbur khawn a ni tih tarlangin heta tang hian Rs.81,37,271/- hmuh a ni bawk a. Heng sum hman dan tur chungchang hi sawiho a ni.

Manipur IDPs te enkawl nana Food, Civl supplies & Consumer Affairs Department leh District hrang hrang D.C ten sum an sen tawh zat, tuna report theih chin belh khawm chu Rs.1,10,40,737/- a ni a. Sum hmanna tlangpui chu relief camp buatsaih nan te, ei leh in tur bakah dawmdawia inenkawlna senso a ni a. District hrang hrang D.C te leh FCS&CA te sum hmanna report ngun taka thlir hovin sawifiah ngaite an sawifiah hnuah D.C te chu buhfai leina atana an sum hman tiam lovin thil danga IDPs enkawlna atana an sum lo hman tawh ang angte chu Executive Committee chuan pek tlak thuai ni se, buhfai leina erawh chu FCS&CA hnenah a vaia pek tura tih a ni a. Hemi baka sum sen belhna awm apiangte chu rang taka Home Department ah theh lut thin turin D.C te chu hriattir an ni bawk. Falkland Relief Camp-a awmte tui harsatna phuhruk nan plastic tuizem 3000 litre dawng 2 lei remtih a ni a. Kolasib District Bilkhawthlira IDP chhungkaw 50 vel awmna, thla tin man chawia mimal Go-down luah hawh mek thlakna tur hmun remchang dang ngaihtuah turin Kolasib D.C chu tih a ni a, a tul dan angin BSUP building Aizawl ah lak chhoh turin Executive Committee chuan a rel a ni.

Executive Committee chuan YMA te leh pawl hrang hrangte, Zoram mipuiten Manipur atanga Mizorama rawn tlan chhiate an lo dawnsawn leh enkawl dan chu chhuanawm a tiin lawmthu a sawi a. Mizoram sawrkar in sum harsatna karah vaibelchhe 5 a tum bakah sawrkar hnathawk ten phal taka sum an thawh khawm chu lawmawm a tiin Mizoram sawrkar leh sawrkar hnathawkte chungah pawh lawmthu a sawi a. Heng sum tlingkhawm te hi renchem leh tangkai taka IDPs te enkawl nana hmang turin Executive Committee Chairman Pu H.Lalengmawia chuan DC te leh department pawimawhte chu a chah a ni.