No.3765/2020-2021

District Election Officer, Pi Maria C.T Zuali, Champhai Bawrhsap chuan State Election Commission hnuaiah VC inthlan tum 2 huaihawtna tur a nih thu leh tunkar chhovah chuan inthlan hun tur pawh tihchian a nih a beisei thu a sawi a. VC inthlanah senso hau tak lo zawngin mahni khuaa mite theuh RO tura ruat an nih thu a sawi a. RO te chu sawrkar hnathawk an nih avangin Party tan lam nei lo tura ngaih an nih laiin Party lam atangin tan lam nei ang tlata hriatna a awm thin a vangin fimkhur hle turin a chah a. Inthlanna thianghlim leh dik a awm theihna turin sawrkarin ringtawk taka RO atana a ruatchhuahte an nih avangin mipuite rin ngama hnathawk turin a chah a. Mipuiteah hriat fiah tawk lo awm theite venga uluk taka zirtir thei tur leh Vote thi a awm lohna tura inthlanna felfai tak kengkawh turin a chah bawk.

Pi Maria C.T Zuali chuan RO te chu engngemaw hriat fuh loh palh an nei a nih pawhin zawt hreh lo tur leh harsatna an tawk a nih pawhin zam mai lova rilru fim tak nena chinfel dan kawng zawng tura chahin, Election lam hotute pawh engtik lai pawha an tana an inhawn reng tur thu a sawi bawk.

Pu Mark Lalthanliana, Electoral Registration Officer chuan mipui siam sawrkar democracy ram kan nih chhung chuan inthlan a awm reng dawn thu leh State Election Commission-in RO te chu inthlannaah dinhmun pawimawh tak a pek thu sawiin, Sawrkar an tanpuina avanga E-Roll thianghlim tak Champhaiin a nei thei chu lawmawm a tih thu a sawi a. RO kalkhawmte chu dik tak leh rinawm taka hna thawk tur leh training hlawk taka hmang turin duhsakna a hlan bawk.

He hun kaihruaitu Pu Lalnunfela Chawngthu Addl. District Election Officer chuan RO atana ruatte zingah inthlan kaihhnawih buaipui tura vawi 1 ruatna leh tawnhriat lo ngah tak takte pawh an awm thu sawiin, inthlan chu kum 5 dana neih thin a nih avangin thiam tawh tih tak tak a awm theih loh avangin dan leh ziakin a sawi anga tih mai a him ber thu a sawi a ni.

Returning Officer 62-te tana Training buatsaihah hian Pi R Lalnunkimi DTO/BDO, Pi Esther Leihang, SDC/DLAO leh Pu Obed Lalmalsawma SDC/DSYO-te'n inthlanna neih tura RO te mawhphurhna hrang hrang leh an tih tur chinte an zirtir a ni.

Champhai District Village Council Final Electoral Roll, 2020- tlangzarh takin a tarlan danin Champhai District chhungah VC 62- a awm a, Voters 50,452 an awm dawn bawk a ni.