No.4318/2021-2022
Aizawl, 17th March, 2022: Tun laia vawk natna hri hlauhawm tak African Swine Fever (ASF) leng mek chuan Khawzawl District chhungah ziaawm lam pan zel rih mah se, tunhnaiah Mizoram hmun thenkhatah he hri avanga vawk boral an awm leh tak avang leh African Swine Fever (ASF) avanga harsatna tawh theih reng a nih avangin District Magistrate, Pu C.C Lalchhuangkima chuan Mizoram Sawrkar-in hrileng ven kawnga inkhuahkhirhna a tarlan ang leh Sec 144 CrPC, 1973 (2 of 1974) in thuneihna a pek tlawhchhanin a hnuaia thupek hi Khawzawl District mipuite zawm turin nimin March ni 16, 2022 khan a chhuah.
1. Ram dang leh State dang atanga Khawzawl District chhunga vawk lalut turte chuan A.H & Vety. Department atangin phalna an la hmasa tur a ni. Amaherawhchu, ASF fihlimna state/ram atang chauhin vawk hi lakluh tur a ni a, vawk lalut turte chuan ASF free a ni tih chianna certificate an nei bawk tur a ni.
2. Vawk lalut turten Veterinary Surveillance Office/Check Post paltlang chauhin an lalut tur a ni. Vawk lalut tur chuan Veterinary Officer-in a enfiah theih turin Vaccination Certificate (Classical Swine Fever) an nei tur a ni.
3. Vawk lalut tur reng rengin dilna form hi District A.H & Veterinary Office, Khawzawl-ah Rs.10/- in lei tur a ni.
4. Khawzawl District chhung bikah khaw pakhat atanga khaw danga vawk lakluh chu, VFA emaw, CAHW leh VC te hriatpuinain phal a ni.
5. Khawzawl District chhungah, vawk hrisel tha ni a hriatte chu Animal Husbandry & Veterinary Department leh Village Council-te hriatpuina chauhin talh theih a ni ang. Vawk talh dan tur ruahmanna kimchang District Animal Husbandry & Veterinary Officer-in a siam chu vawk talh tur ten zawm vek tur a ni.
6. ASF rinhlelh vawk damlo/thi a awm chuan rang taka report tur a ni a. Vawk thi a awm chuan tha takin (6 ft a thukah) chinai nen phum tur a ni.
He thupek zawm lote chu thubuai siam sak an ni ang a, IPC Sec.188 hmangin hrem theih an ni ang.
He thupek hian Office Order number ngai 27.01.2022 a chhuah tawh chu a luahlan ang a, tihchhuah a nih atanga thla 2 (hnih) chhung a huam ang.
