Aizawl District huam chhung khaw 13 leh Kolasib District huam chhung khaw 2 a Village Council bye-election neih tur chung chang ngaihtuahin vawiin khan Mizoram State Election Commissioner Pu C Ropianga hovin a pisaah sorkar mi pawimawhte an thukhawm.

Aizawl District huam chhunga khaw 13 - Zokhawthiang, North Tinghmun, Mauchar, Zohmun, Palsang, Sakawrdai, Khawpuar, Vaitin, North Khawdungsei, Thingsat, New Vervek, Damdiai leh Lungsum bakah Kolasib District a khaw pahnih - Saipum leh Saiphai-ah te hian Village Council inthlanpui khaw dangte rualin kum kalta February ni 23 khan dan leh thupek lama harsatna avangin buatsaih theih a ni lova. Hemi hnu hian Bye-election buatsaih turin SEC chuan hma a la leh a, inthlan chuh tum hming pe lut an awm tak loh avangin inthlanna neih theih a ni ta chuang lova, sorkar chuan VC term dinglai hun a pawt sei ta a ni. Hun pawhsei hi August ni 25-ah a lo tawp dawn tak avangin Bye-Election hi buatsaih a tul ta a, State Election Commissioner chuan khaw 15 a VC Bye-Election chu July, 2013 chhung ngeia neih tum a nih thu meeting-ah hian a sawi a ni.

Vawiin meeting-ah hian he inthlan atana electoral roll endik hna, Special Summary Revision neih dan tur ruahmanna siam a ni a. Draft Publication of Electoral Roll chu 24.6.2013-ah tarchhuah a ni anga, 24.6.2013 leh 27.6.2013 inkarah dilna (claims) leh sawiselna (objections) te chu thehluh theih a ni ang. 28.6.2013 leh 3.7.2013 inkarah dilna leh sawiselna chu chinfel a ni ang a, 4.7.2013 leh 6.7.2013 chhungin Electoral Roll hi print a ni ang a, final roll chu 8.7.2013 hian tarchhuah a ni ang.

Vawiin meeting-ah hian Mizoram State Election Commission Secretary Pu H Darzika leh official dang te bakah LAD Director Pu A Biaklawma, Aizawl leh Kolasib Disrict DC aiawh, SP aiawh leh DLAO te an tel a ni.