Vawiin chawhma dar 10:30 am khan Saiha leh Lawngtlai District tana buatsaih “Rorelna Dik Seminar” chu Ethics Committee bultumin CYLA Hall, Lawngtlai-ah hlawhtling taka hman a ni. He Seminar-ah hian Supply Minister Pu H.Rohluna chuan Keynote Address sawiin hun a hmang.

He seminar hi Session hnih a then a ni a, Session khatna hi Ethics Committee Member, Rev. R. Lalrinsanga’n a kaihruai a. Rev. Dr. L.H.Lalpekhlua, General Secretary, LIKBK in hunserh hmangin, Secretary, Ethics Committee, Major Dr. J.Thanruma’n welcome address leh Member-te in hmelhriattirna hun a hman hnu-ah Keynote Address sawiin Minister Pu H. Rohluna chuan hun a hmang nghal a ni.

Pu H. Rohluna chuan Rorelna Dik kalpui hi Roreltute mawhphurna a nih mek laiin, Roreltute siamtu mipui pawh hian mawhphurna sang tak an neih hi an theihnghilh a hlauhawm a ni, a ti. Pu Rohluna chuan mi tam tak chuan dan in a phal loh leh thil dik lo a ni tih an hriat reng pawh an mahni hlawkna tur a ni phawt chuan roreltute tih tir tura nawr hreh miah lo, midang chu chhe vek mahse pawi tihna reng reng nei lo te an nih thu a sawi lang a ni. Media te hi roreltu leh mipui inkara palai hnathawktu, mipui hnena thudik tangkai hrilhhriat leh zirtirna kawnga hna pawimawh tak thawka, sawrkar khalh ngil theitu an nih angin, rorelna dik kalpuina kawngah pawh mawhphurna sang tak an nei a ni, a ti bawk.

Pu Rohluna chuan “ Nitin ei leh bar khawihtu department Minister nih takah chuan sawiselna dawng nasa ber pawl pawh ka ni ngei ang, chutiang Minister in a rorelna dik seminar a keynote address ka sawitur hi ka huphurhin ka in thlahrung hle a ni” a ti a, “ mahse ka thil tih-ah ka chiang a, theih tawp ka chhuah thin bawk a, chu chuan min ti lawm a ni, in sawi fel tul ka ti lo, ka thil tih in a hril zawk turah ka ngai” tiin a sawi chhunzawm bawk.

He rorelna dik seminar 1st session-ah hian Rev. C. Rosiama, Chairman, Ethics Committee buatsaih “Rorelna Dik: Bible-in a sawi dan” tih leh Rev. C. Lalsangliana, Member, Ethics Committee buatsaih “Rorelna dik : Mizoramah” tih thupui hmanga an paper present te ngaithlak ho a ni.

2nd session hi Upa Lalnilawma Colney, Member Ethics Committee in a kaihruai a, Rev. Dr. K. Thanzauva, Member, Ethics Committee in discussion sawihawnna hun a hman zawh a, huangzau tak leh inpawh takin General discussion hun hman a ni. Lawmthu sawina leh kharna hun hi Pi Catherine Laltanpuii, Member, Ethics Committee in a hmang a, mipui kalkhawmte chu Rev. F. Ramdinmawia, Ex-Secretary, BCM in malsawm tawngtaiin a tin a ni.

He seminar on Good Governance (Rorelna dik seminar) –ah hian Parliamentary Secretary, Pu H.Zothangliana, MLA te, Pu C. Ramhluna leh Pu Nirupam Chakma te, MADC, LADC Leh CADC a an CEM leh Chairman te bakah an hruaitu dang te, Lawngtlai leh Saiha district DC te leh Saiha leh Lawngtlai District-a head of office hrang hrang te, NGO hruaitu te, politician te, kohhran hruaitu te, prominent citizen te, V/C te, Chanchinbu mite leh sawmbik mi tam takin an chhim a ni.