Vawiin chawhma dar 11:00 khan Serchhip Districta Assembly Consituency pathuma VC Draft Electoral Roll 2020 chu District Election Officer leh District Bawrhsap charge la mektu Pu H. Dolianbuaia chuan a tlangzarh.

Bawrhsap chuan thu sawiin, kan hma lawka VC inthlan kan neih tur atan inbuatsaihna ngawrh taka kalpui mek a ni, a ti a, Non-Tribal te paih an nih dan leh India Dan (Citizenship Act 1950) zulzuia felfai taka VC Roll chu buatsaih tum anih thu a sawi. Roll thianghlim leh felfai tak kan neih theih nan Assistant Electoral Roll Officer (AERO) te hmalakna in district chhung khaw tin leh VC tin ah Village Level Standing Committee din a ni a. Hun chep tak karah VC Election atan hian khaw tina Booth Level Officer (BLO) te chu Village Level Officer (VLO) atana hman an nih thu leh anni kaihhruaina hnuaiah VC Roll felfai tak buatsaih fel thuai tum a ni a, Political Party tin leh tlawmngai pawl aiawhte pawh theih tawp chhuahpui turin a sawm nghal a ni.

Vawiina VC Draft Roll tlangzarhna ah hian Pu Vanlalhmachhuana, Asst. District Election Officer chuan VC Draft Roll buatsaih anih dan leh Elelction Commission of India thuchhuah anga January ni 1, 2020 hmalama kum 18 tling chinte chauh thun belh annih thu a sawi a. Inpaih, inthun belh leh Roll chungchanga tihfel ngai awm apiangte chu tun thla ni 19 hmaa chinfel vek anih tawh dawn thu leh tun thla tawp ni 31.3.2020 ah chuan VC Final Roll chu peihfel vek tur anih tur thu a sawi bawk.

Vawiin a VC Draft Roll 2020 tlangzarh taka atanga a landan chuan Serchhip District chhunga Assembly Constituency pathum ah VC 54 awmin, Voters Mipa – 23,099 leh Hmeichhia – 24,141 awmin, voter zawng zawng 47,240 an ni a; in dinglai – 14,355 a awm mek bawk a ni.

VC Draft Roll 2020 tlangzarhnaah hian EO, ERO, AERO leh Political Party hrang hrang aiawhte, tlawmngai pawl aiawhte bakah thuthar lakhawmtute an tel a ni.