Vawiin khan Sawrkar Flagship programme Socio Economic Development Programme (SEDP) kalpuina atana ruahman, Veterinary, Fishery & Sericulture Board chu an chairman Animal Husbandry & Veterinary Department enkawltu Minister of State Dr. K. Beichhua a hovin a pisa-ah an thukhawm a. Meeting ah hian Board Vice Chairman Pu C. Lalmuanpuia, MLA; Board Member te leh Department pathum hotulu te an tel a ni.

Dr. K. Beichhua chuan SEDP in a tum pawimawh tak pakhat chu mipui te eizawnna puitling an nei thei nan leh chhungkua te an dinchhuah thei nana ruahmanna siam sak leh tanpui pek ani tiin Veterinary, Fishery & Sericulture Board chu Board pawimawh tak, huang zau tak nei anih thu a sawi a. SEDP hnuaia Mamit District a pangngang khawitu beneficiaries mi 300 leh Mizoram pumah ranvulhtu mi 620 thlan te chu March thla ral hma in tanpuina an dawn tur ang an dawn ngei thei nan ruahmanna kalpui mek a ni, a ti. Central Sector scheme te pawh a thei angin angin convergence hmangin SEDP nena thlunzawm a hma lak a tul dante a sawi bawk.

Meeting ah hian Sericulture Department hnuaia SEDP hma lak dan tur te, Animal Husbandry & Veterinary Department in hma an lak tawhna chin te leh Fisheries Department in hma an lak dan te an thlirho a. Baseline Survey a rang lama tihfel nise tiin meeting in an rel a, Department pathum ten a hma lama Survey hi peihfel tura hrilh an ni bawk.

NERTPS hnuaia Mamit District a Sericulture Department hmalakna in nikum khan pangngang khawitu beneficiaries mi 200 tanpui an ni tawh a kumin March thla ral hma ngeiin Mamit District ah tho, NERTPS chu SEDP nen thlunzawmin pangngang khawitu beneficiaries mi 300 te chu tanpui pek an ni leh dawn a. Hemi chungchanga hma lakna chu Sericulture Department Director in Board meeting ah a pharh a ni. Animal Husbandry & Veterinary Department a SEDP Pilot Project atan Mizoram pumah ran vulhtu beneficiaries mi 620 thlan an ni tawh. Heng ranvulhtute thlanchhuah te hi – Pig Fattener Unit, Piggery Unit, Broiler Farming Unit leh Rural Backyard Poultry Farming ah te then an ni a. Beneficiaries 620 te hi Instalment hnihin tanpui cheng nuai 3 an dawng dawn a. Hemi chungchanga hma lakna kal mek te chu Animal Husbandry & Veterinary Department Director in meeting ah a report a. Fisheries Department in SEDP hnuaia sangha chaw, sangha chi leh sangha manna len lei nana ruahmanna an tihfel tawh thu meeting ah an report bawk a ni.