No.3917/2020-2021 

Kan hma lawka Village Council inthlan neih tur chungchanga hriat tur pawimawh sawiho turin nimin khan Lunglei DC leh District Election Officer ni bawk Pu V Lalsangliana kaihhruaiin a Office Chamber-ah meeting neih a ni. Meeting ah hian Lunglei SP Pu Stephen Lalrinawma, Addl DC Pu R.Vanrengpuia leh election kaihhnawih official-te leh party hrang hrang aiawhte an tel a ni.

Lunglei DC Pu V Lalsangliana chuan State Election Commission thuchhuah dated 05/08/2020 angin Mizoram chhungah Village Council election neih tur anih angin Lunglei District-ah pawh Village Council 113-te tan inthlanpui vawi 20-na tur chu ni 27th August, 2020 (Ningani) hian buatsaih ani dawn a ni, a ti a. Lunglei District chhungah VC inthlan tluang taka neih anih theih nan inpuahchahna chak taka kalpui mek zel niin Nodal Officer atan mi pakua(9) ruat fel tawh an nih bakah election-a mawhphurhna hrang hrang nei tura ruat te pawh training uluk taka neih pui an nih thu a sawi a. VC inthlan muanawm leh felfai tak neih anih theih nan political party-te chu thawhho puiah sawmin sawrkarin inkaihhruaina a siam te tha taka zawm tlang turin a ngen bawk a ni. Harsatna an neih emaw zawh fiah duh an neih te Election office ah te thlen vat thin turin a sawm bawk a ni.

Meeting-ah hian political party leh candidate - te zawm tur Model Code of Conduct leh SEC thuchhuah Village Council leh Local Council inthlanpui chhunga inkaihhruaina te zir ho a ni a.SEC thuchhuah chuan VC Election-ah hian COVID-19 hrileng avangin physical distancing, mask vuah, hand sanitizer hman te uluk taka zawm tur a ni, a ti. 

Lunglei District huamchhunga Village Council 113-te tana inthlan kalpui turah hian a mawhphurhna neite chetlak dan tur inkaihhruaina Lunglei District Movement Plan siam niin polling party - te chu 24th-25th August, 2020 ah an duty na hmun tur an pan dawn a. Returning Officer 113-ten an Village Council chan theuh khua tun dinhmunah an thleng fel tawh bawk a ni.