April ni 30 a Village Council inthlanna lo awm tura Kolasib District chhunga Election Observer atan ruat Pu C.Lalhmachhuana, ITS hovin nimin khan DC Conference Hall-ah he Inthlanna atana Kolasib District inpuahchahna leh ruahmanna siam lailawk te an thlir hova. Meeting ah hian Kolasib DC Pu Jitender Yadav, IAS; Kolasib SP Pu RP Meena, IPS leh Election Officer Pu R.Lalnghakliana leh officer dangte pawh an tel a, hemi chungchang a bik takin venhimna chungchang zau takin an sawiho a ni.

Election Observer Pu C. Lalhmachhuana chuan inthlanna fel fai leh muanawm neih anih theih nan inthlanna buaipuitute, Political Party aiawhte, NGO te, media leh mipui tawiawmna a ngen a, member te leh thuthar thehdarhtute chu inthlanna felfai taka neih anih theih nan finchhuah turin a ngen bawk.

Nimin a meeting ah hian Kolasib DC Jitender Yadav chuan Kolasib District inbuatsaihna te tarlangin invauna avangin Saipum leh Saiphai ah Nomination file an awmlo a, hetih rual hian Nomination file fel anih hnu ah invauna vang bawkin Khaw 3 dang - N.Chawnpui, N.Hlimen leh Phainuam ah VC Candidate tura Nomination file fel tawh te an inhnuhdawh leh vek thu a sawi.