Ni 2 awh tur Vety Diploma Holder Association General Conference vawi 20-na leh Seminar chu vawiin khan Cooperation Minister Pu J.H. Rothuama’n Electric Veng YMA Hall-ah a hawng a. Kumina an inkhawmpui leh seminar thupuiah chuan ‘NLUP hlawhtlinna’ tih an hmang a ni.

Khuallian Pu J.H. Rothuama chuan Mizoram sorkarin rethei dawmchhuahna tura hmachhawp lian ber a nei NLUP dawngtu zingah AH&Vety hnuaia ranvulh thlangtu mi 9850 lai an awm avangin he policy hlawhtlinna thui tak chu he department-ah hian a innghat a ni, a ti. Minister chuan Vety Department in sa thianghlim ei tur dehchhuah kawngah te, ranchaw mamawh lakluh te sawngbawl kawngah te, ranvulh hrim hrim thingtlang leh khawpui hmun hrang hranga hma an lakna te hlawhtlinna nasa tak an neih avanga a lawmpui thu a hrilh a. Aizawl khawpui chhunga mamawh em em pakhat ran damdawi in lian tham sakna tura Sorkar Laipui atanga cheng nuai 482 an hmuh thu tarlangin a hmun tur an mamawh tak chu Bawngkawn-a Brigade ram chhuahsan mekah ngaihtuah sak an ni ang, a ti.

Conference/Seminar hmanpuitu AH&Vety Director Pu L.B. Sailo chuan department hmalakna leh hmachhawp langsar zual chipchiar takin a tarlang a. Mizoram AH&Vety Department hmalaknaah te hian Sorkar Laipui mit a tlung hle a, chuvangin rawtna hrang hrang an thehluh zingah hospital 8 leh dispensary 49 sak that nan cheng nuai 466; hmun hrang hranga ran talhna in sak nan cheng nuai 879; vawk kahrai scheme atan cheng nuai 500 leh ranchaw lama intodelh nan cheng nuai 587 te chu phal sak mek an nih thu a sawi.

Vawiina tan tak Vety Holder Association Conference thu ngaihtuah tur zingah hian VFA training tur qualification chu HSSLC ni tawh se tih te, VFA post ruak hnawhkhah anih theih nan saorkar ah thlen ni se tih bakah an Association chhung inrelbawl dan thil chi hrang hrang a tel a ni. Naktuk hian kum 2012-13 chhunga an pawl hruaitu thar tur an thlang nghal dawn a ni.