2068/2022-2023
Aizawl, 26th September, 2022 : AH&Vety Minister Dr K.Beichhua chuan vawiin khan Nisapuiah bawnghnute dahkhawlna in (Milk Collection Centre) leh khawl hmanga bawnghnute vawn thatna (Bulk Milk Cooler) a hawng a, Minister hi bialtu MLA, Commerce & Industries Development Board Vice-Chairman nib awk Pu K. Laldawngliana, Aizawl Deputy Mayor Pu R. Thanglura, AMC Executive Councillor Pi B.Lalawmpuii, AH&Vety Secretary Pi Lalzarmawii, AH&Vety Director Pi Lalrinpuii Sailo, MULCO Chairman Pu Vanlalchhunga bakah AH&Vety leh MULCO official ten an tawiawm a ni.

Milk Collection Centre hawn inkhawmah hian khuallian Dr K. Beichhua chuan thu sawiin Nisapui khua a bawnghnute dahkhawlna leh a vawn thatna hawn a ni ta chu thil lawmawm leh chhinchhiahtlak, bawng vulhtute tana hmasawnna rahbi thar a ni, a ti a. COVID-19 hripui len vangin hun harsa kan tawk a, heti chung hian kan phak ang tawk tawkah hma kan la ve zel a, kan hmalakna tlawm tak takte Pathianin mal a sawm a, tun hma chuan Aizawl Polyclinic bak ran enkawlna damdawi in kan nei lova, tunah erawh chuan Siaha, Lawngtlai, Lunglei, Serchhip, Mamit leh Kolasib-ah ran damdawi in kan nei tawh a, Champhaiah pawh reiloteah kan hawng leh dawn a ni, a ti a. District thar pathumah pawh hawn ngei a nih theih nan tan lak a nih tur thu a sawi a ni.

Ran kah rai (artificial insemination) pawh hun dang zawng aiin tun kum hnih kalta chhung khan kan ti hnem a, hei hian thawktute inpekna leh thawhrimna a tilang chiang hle a ni, a ti a. Nisapui a bawng vulhtute chu theihtawp chhuaha thawk tura fuihin harsatna an tawh pawhin a hnenah thlen hreh lo tur leh a theih ang anga sutkian dan zawn a nih tur thu a sawi bawk a ni.

Khualzahawm Pu K. Laldawngliana pawhin a bial chhunga Milk Collection Centre pawimawh tak hawn a ni ta chu Nisapui khaw mipuite leh bawng vulhtute aiawhin lawmthu a sawi a, hmasawn pui ngei turin theihtawp chhuahin hma an la chhunzawm zel dawn tih a sawi a. Dik tak leh rinawm tak leh thahnemngai taka hna thawk tur an ni tih sawiin bawnghnute quality tha sawr zel turin tan an la zel dawn tih sawiin a bial chhung khaw dangah pawh Milk Collection Centre neih belh zel tura tan lak zel a tum thu a sawi bawk a ni.

Nisapui Milk Collection Centre hi National Programme on Dairy Development kaltlanga sak a ni a. He programme kaltlang hian Centre sakna tur cheng Rs 2,00,000/- hmuh niin MULCO in Rs. 1,30,000/- an thawh belh a, a vaiin Centre sakna atan hian Rs 3,30,000/- sen a ni. October ni 31, 2019 khan sak tan niin March ni 21, 2021-ah building hi sak zawh a ni. Collection Centre sakna hmun hi Nisapui Village Council in kum 2018 khan Nisapui Primary Co-operative Society hnenah ram an pe a, bulding hi a dung feet 24, a vang feet 15 a zau a ni a, Collection Centre sak chhung hian Nisapui Primary Co-operative Society member 20 ten hnatlang vawi 45 neiin tha an sen zat hi 900 a ni.

Bulk Milk Cooler (BMC) hi bawnghnute litre 1000 dawng a ni a, D&K Business, Aizawl hnen atang kum 2019 khan Rs 6,82,040 senga lei a ni a, kumin June thla khan bun fel a ni. BMC hi tunlai thiamna sang ber ber hmanga design a ni a, zing leh tlaiah bawnghnute dah luh thin niin, dah luh atanga darkar 2/3 chhungin degree Celsius 4 ah bawnghnute tih vawh a ni a. MULCO tanker ten zing dar 5:45 ah bawngnute hi an la thin a ni. BMC refrigeration atan R134 hman a ni a, electrical connection hi 3 phase a ni bawk. Power supply a khaihlak changa hman turin Diesel generator (Jackson Cummins Silent Generator) 10 KVA, Rs. 4,11,820/- man dah a ni bawk a ni.
July, 2022 atangin Collection Centre ah hian bawnghnute chhun khawm tan a ni a, nitin chawh rualin litre 237.17 chhun niin, MULCO hian litre khat Rs. 47.41 in a leisak thin a ni.

Nisapui Milk Producers’ Cooperative Society hi March ni 4, 2021 ah register niin, an registration number chu KLB-87/2020-21 a ni a. Society hnuaiah hian bawng hnute sawr lai 38 leh a dry 16 an awm mek a ni.