Man Power Development Board, SEDP Vice Chairman leh Lunglei North Bialtu MLA ni bawk Dr. Vanlaltanpuia chuan Entrepreneur Development Scheme (EDS) hnuaia ESDP on Certificate Program in Entrepreneurship chu Planning & Programme Implementation Department Conference Hall-ah vawiin khan hawngin khuallian a ni. He hun hi Pu Saihlira, Principal Adviser, Planning & Programme Implementation Department chuan a kaihruai a ni.

Khuallian Dr. Vanlaltanpuia chuan Training Program pawimawh tak mai, mizo thalaite tana bungthar hawnnaah sawm a nih chu lawmawm a ti a. Mizoram ah hian ram leilung hausakna aiin Man Power/Human Resource hi a tam zawk a, chumi atana hma la turin sawrkar hnathawktute leh sawrkar pawh a in puahchah mek a ni, a ti a. Mizo te hi hnam vannei leh hnam ropui tak kan ni a, Pathianin thiamna hrang hrang min pe a, hmasawnna nei tur hian mizo thalaite hian theihna kan nei hnem a ni, a ti a. Training tura thalai lehkhathiam ten ke an penchhuak chu lawmawm a ti a, eizawnna bul tanna hmalak a nih a, ngaihtuahna tizau tura training hlu tak hmangturin trainee te duhsakna a hlan a ni.

Training Faculty te hi C.Lalruatsanga, Assistant Professor, ICFAI;  Lalnunmawii Ralte, Assistant Professor, ICFAI; Malsawmtluangi, Assistant Professor, ICFAI; Dr.Laldinliana, Assistant Professor, MZU; Rinzuala, MIZOFED, Managing Director  leh Joseph L.Ralte, Founder MEN te leh midangte an ni. Training hi ni 5 awh tur a ni a, an vaiin mi 30, hmeichhia 12 leh mipa 18 an ni a, zirna lamah chuan B.Sc (Maths), BA (Economics), IMBA leh M.Com  te an ni.